Shyǵys Qazaqstan oblysy Altai aýdany máslihatynyń hatshysy Larisa Grechýshnikova áielder men jastarǵa 30 paiyzdyq kvotanyń berilýi depýtattyq korpýstyń jańarýyna jol ashatyndyǵyn aitty, dep habarlaidy QazAqparat.
Bul týraly ol Óskemen qalasynda ótken «Sailaý-2021: mańyzy men erekshelikteri» atty sarapshylar keńesiniń otyrysynda málimdedi.
«Parlament Májilisi depýtattarynyń kezekti sailaýy taiap qaldy. Barlyq saiasi partiialarǵa sailaý aldyndaǵy daiyndyq jumystaryna, sailaý platformasyn ázirleýge ýaqyt berilgen. Biyl halyq qalaýlylary tek partiialyq tizimder boiynsha sailanyp, ózin-ózi usynatyn kandidattar qatysa almaidy. Bul qoǵamdaǵy partiia róliniń burynǵyǵa qaraǵanda artqanynyń belgisi. Endi partiialar belsendilikti arttyryp, jańa baǵdarlamalardy, tyń bastamalardy usynýǵa umtylýy tiis», - dedi Larisa Grechýshnikova.
Onyń aitýynsha, sailaýda áielder men jastarǵa 30 paiyzdyq kvotanyń berilýi depýtattyq korpýstyń jańarýyna jol ashady.
«Osyndai ózgeris genderlik saiasattyń tujyrymdamasyna sáikes keledi. Sondai-aq jastardy saiasi arenaǵa tartýdyń birden-bir quraly bolmaq. Máselen, Shyǵys Qazaqstan oblysy Altai aýdandyq máslihatyndaǵy depýtattardyń 50 paiyzy - áielder. Nátijesinde qandai da bir taqyrypty talqylaǵanda jan-jaqty pikir almasýǵa, kez kelgen máseleler týyndaǵanda pragmatikalyq sheshim qabyldaýǵa múmkindik týyp otyr. Biz depýtattyqqa ótetin jas býynnan jańasha kózqarastar kútemiz», - dedi Altai aýdany máslihatynyń hatshysy.
Búginde koronavirýs pandemiiasyna bailanysty elimizde karantindik shekteýler engizilgen. Larisa Grechýshnikovanyń aitýynsha, bul sailaýǵa qatysty sharalardy ótkizýdiń tásilderin ózgertedi.
«Sailaý kezinde halyqtyń densaýlyǵy basty nazarda bolýy tiis. Sondyqtan sanitarlyq talaptar qatań saqtalyp, áleýmettik qashyqtyq pen maska rejiminiń buzylmaýyn baqylaýdy kúsheitý qajet», - dedi ol.
