Búgin QR Parlamenti Májilisi jalpy otyrysta Qazaqstan Respýblikasynyń keibir zańnamalyq aktilerine ekstremizmge jáne terrorizmge qarsy is-qimyl máseleleri boiynsha ózgerister men tolyqtyrýlar engizý týraly» zań jobasyn birinshi oqylymda maquldady, dep habarlaidy Ult.kz tilshisi QazAqparat agenttigine silteme jasap.
«Sizderdiń talqylaýlaryńyzǵa engizilip otyrǵan zań jobasy Qaýipsizdik Keńesi otyrysynda Memleket basshysynyń tapsyrmasy boiynsha ázirlendi. Jobany daiarlaý kezinde sońǵy kezderi elimizde jáne álemde oryn alǵan lańkestik qylmystar, sondai-aq bul qylmystarmen kúres boiynsha ońtaily tájiribe eskerildi»,-dedi QR Ulttyq qaýipsizdik komiteti tóraǵasynyń orynbasary Marat Qalqabaev zań jobasyn depýtattarǵa tanystyrý barysynda.
Onyń sózine qaraǵanda, Aqtóbe men Almatydaǵy sońǵy oqiǵalar ekstremizm jáne terrorizmge qarsy is-qimyl salasynda zańnamaǵa ózgerister engizýge qajetti indikator boldy.
Zań jobasyn qabyldaýdaǵy maqsat - ekstremizmge jáne terrorizmge qarsy is-qimyl, qarý-jaraq ainalymy jáne kóshi-qondy retteý salasyndaǵy qoldanystaǵy zańnamany jetildirýge negizdelgen.
Onda qarý-jaraq ainalymyn, ony saqtaý tártibin baqylaýdy kúsheitý, onyń ishinde azamattyq, qyzmettik qarý jáne oq-dári ainalymy, sondai-aq kúzet qyzmetin júzege asyrý salasynda jumys isteitin kásipkerlik sýbektilerin memlekettik baqylaýdyń erekshe tártibin júzege asyrý eskerilgen.
Budan bólek, ekstremizm men terrorizm úshin, onyń ishinde halyqaralyq lańkestik uiymdarǵa jáne sheteldik qarýly janjaldarǵa qatysqany úshin jazaǵa tartý sharalaryn kúsheitý, lańkestikke yqpal etetin dini toptar men birlestikterdiń qyzmetine tyiym salý qamtylyp otyr.
Sonymen qatar terrorizmge qarsy is-qimyl týraly zańnamany saqtamaǵany úshin, sondai-aq qoldanylýy mindetti tehnikalyq quraldardyń jaramsyzdyǵy úshin kúzet qurylymdarynyń jáne lańkestik jaǵynan osal nysandar ieleriniń ákimshilik jaýapkershiligin engizý kózdelip otyr.
