Salyq organdary dúkende satyp alynǵan taýar chegin laqtyryp jiberýdiń nemese belgisiz adamdarǵa berýdiń qaterin eskertedi, dep habarlaidy "Ult aqparat".
Kez kelgen adam saýda jasaǵannan keiin túbirtekti túkke jaramsyz dep oilaýy múmkin. Máselen, siz dúkennen kele jatqanda aldyńyzdan shyqqan belgisiz bireý «bonýs jinaý úshin túbirtegińizdi bere alasyz ba?» dep suraýy yqtimal. Álbette, oiyńyzǵa eshteńe kelmei chekti ustata salasyz. Alaida, dál osy jaǵdaidan alaiaq nemese tolyqqandy alaiaqtar josparynyń qatysýshysy bolyp ketýińiz ábden yqtimal.
«Máselen, alaiaqtar sizdiń túbirtegińizdi alyp dúkenge qaita barady. Belgili bir zattyń birkasyn julyp tastap, ony qoldy qylýy múmkin. Al esik aldyndaǵy kúzetke siz bergen túbirtekti kórsete salady. Alaiaqtyqtyń ekinshi túri: esh zatty urlamai-aq álgi adam sizdiń chegińizdi dúken iesine qaitaryp, aqshany talap ete alady. Sebebi klient zań boiynsha alǵan taýaryn qaitara otyryp, aqshasyn belgili bir ýaqyttyń ishinde talap etýge quqyly. Alaiaqtardyń túbirtekke qatysty áreketinen zardap shegetin dúkender ǵana emes. Saýdadan keiin karta arqyly tólem júrgizetin satyp alýshy da máselemen betpe-bet keledi. Plastik kartany paidalaný arqyly bank operatsiiasyn oryndasańyz, sizge qatysty málimetterdi paidalanyp ta zańǵa qaishy áreket jasalýy múmkin. Chektegi tranzaktsiia málimetteriniń kómegimen ákki alaiaqtar belgili bir aqparatty bilip alyp, artynsha hakkerler sizdiń banktik shotyńyzǵa da jetip alady», - dep eskertedi Mańǵystaý oblysy boiynsha Memlekettik kirister departamenti.
Osy sebepti departament taýarlyq chek – bóten qolǵa túspeýi tiis tólem qujaty ekenin eskertedi. Ony dúkenge jaqyn qoqys jáshigine tastaýǵa bolmaidy.
Departamenttiń málimetinshe, siz chegińizdi óz paidańyzǵa jarata alasyz. Ol úshin «Túbirtekti talap et te, syilyq utyp al!» atty keń aýqymdy respýblikalyq aktsiiaǵa atsalysý kerek. Biyl 13 mamyrda bastalǵan dástúrli aktsiia jyl sońyna deiin jalǵasady.
«Túbirtekti talap et te, syilyq utyp al!» aktsiiasyna qatysý úshin qazaqstandyqtar «Wipon» mobildik qosymshasyn júktep alýy tiis. Izinshe onlain-KKM arqyly fiskaldy túbirtek týraly málimetti joldap, qyzmet nemese taýardy alǵanyńyzdy rastaý kerek. Eger onlain-KKM fiskaldy túbirtekti bermese, videomaterial arqyly nysannyń qaida ornalasqanyn kórsetip, zańsyzdyqtyń jolyn kesýge bolady.
Túbirtekti tapsyrǵannan keiin ony jiberýshi jyl sońyna deiingi basty syilyqqa talasa alady. Bir adamǵa qansha túbirtek bere berse de ruqsat. Fiskaldy túbirtekti bermegenin rastai alǵan jaǵdaida azamattar mobildik telefonyna 1000 teńge kóleminde syiaqy ala alady. Bul aktsiia halyqtyń azamattyq belsendiligin arttyryp, quqyqtyq mádenietke baýlý, kóleńkedegi ekonomikanyń úlesin azaityp, ashyq básekeni damytý úshin qolǵa alynǵan.
