«Slavian bazary» halyqaralyq baiqaýynyń jeńimpazy, qazaqstandyq ánshi Ádilhan Makinge týǵan jeri Soltústik Qazaqstan oblysynda qurmet kórsetildi, dep habarlaidy "Ult aqparat". Óńir basshysy jas talantty ataýly jeńisimen quttyqtady.
«Ádilhannyń jeńisi Qyzyljar óńiri shyǵarmashyl tulǵalarǵa bai ekenin taǵy bir dáleldedi. Bizdiń óńirden Ermek Serkebaev, Samal Eslámova jáne taǵy basqa da belgili azamattar shyqty. Ádilhannyń jeńisi jastarǵa stimýl beredi, onyń jetistigi bárine úlgi. Ol oblys turǵyndarynyń ǵana emes, barsha qazaqstandyqtardyń mereiin ústem etti», — dedi Qumar Aqsaqalov.
Óńir basshysy ánshige qurmet gramotasy men 500 myń teńgeniń sertifikatyn tabys etti. Ádilhan Makin oblys ákimine jáne jerlesterine qoldaý bildirgenderi úshin alǵysyn bildirdi.
«Baiqaý 15 shilde aiaqtaldy. Endi mine týǵan jerime kelip syi-qurmetke bólenip jatyrmyn. Sizderdi, týǵandarymdy, ustazdarymdy kórgenime qýanyshtymyn. Osyndai jobadan keiin úlken kompozitor, professorlarmen jumys istesem degen nietim bar. Áli halqymdy jaqsy ándermen qýantamyn degen úmittemin. Úlken isti bastamas buryn týǵan jerime baryp, úlkenderden bata alǵym keledi», - dedi Ádilhan Makin.
Ádilhan Makin Maǵjan Jumabaev aýdanynda dúniege kelgen. Mektep qabyrǵasynda ár túrli baiqaýlarǵa baq synaǵan. Petropavl qalasyndaǵy óner kolledjinde oqydy. Kezdesýge onyń ustazdary qatysyp, úlken jetistigimen quttyqtady.
