Ustazdar kúnine orai Qyzylordada aimaqtyń úzdik muǵalimderi marapattaldy.
Oblys ákiminiń orynbasary Rýslan Rústemov ustazdardy kásibi merekelerimen quttyqtap, aimaqtyń bilim berý salasyndaǵy jetistikterin atap ótti.
«Biz bilim berý salasyna airyqsha kóńil bólemiz. Sońǵy jyldary biýdjetten bólinetin qarajattyń da eń kóp bóliginiń áleýmettik salaǵa, sonyń ishinde bilim salasyna bólinýi - sonyń dáleli. Biyl aimaqtyń 60% qarjysy áleýmettik salalarǵa jumsaldy. Elbasynyń tapsyrmasyna sáikes bizdiń óńirimizde úsh aýysymdyq mektepter máselesi sheshildi, apattyq mektepter qatary joiyldy jáne 3-6 jas arasyndaǵy búldirshinder balabaqshamen 100% qamtyldy. Bilikti de bilimdi ustazdarymyzdyń arqasynda daryndy oqýshylarymyz shet elderde halyqaralyq olimpiadalar men ǵylymi joba jarystarynda júldeger atanyp júr. Biyl mektep bitirgen túlekterdiń 97%-y joǵary jáne arnaiy oqý oryndaryna tústi»,-dedi oblys ákiminiń orynbasary.
Kásibi biliktilikteri úshin birqatar oblys ustazdary QR Bilim jáne ǵylym ministriliginiń «Y.Altynsarin» jáne «Bilim berý isiniń Qurmetti qyzmetkeri» tósbelgisimen, ministrliktiń Qurmet gramotasymen, oblys ákiminiń Alǵys hattarymen marapattaldy.
Sondai-aq, «Ustazym, ótermin bir ózińe basymdy iip...» taqyrybyndaǵy beinerolikter saiysynyń jeńimpazdary Aral aýdanynyń №13 mektebine, Qazaly aýdanynyń №93 bilim oshaǵyna jáne Qyzylorda qalasynyń №222 mektebine baǵaly syilyqtar (noýtbýk) tabystaldy.
Atap óteiik, 2018-2019 jańa oqý jylynda aimaqtaǵy 293 mektepte 20 466 muǵalim jumys isteidi, al oqýshylar sany - 153 541-dy qurap otyr.
Esterińizge sala keteiik, Dúniejúzilik ustazdar kúni 1994 jyldan bastap jyl saiyn 5 qazanda atap ótiledi. 1966 jyly muǵalimderdiń mártebesi týraly IýNESKO / HEU usynysyna qol qoidy. Bul kún Birikken ulttar uiymynyń Balalar qorymen (IýNISEF), Birikken ulttar uiymynyń Damý baǵdarlamasymen (BUUDB), Halyqaralyq eńbek uiymy jáne Bilim berý internatsionalymen birlesip qurylǵan. Qazaqstanda muǵalimder kúni qazan aiynyń birinshi jeksenbisinde atap ótiledi.
Jańa oqý jylynda Qazaly jáne Jańaqorǵan aýdandarynda 300 orynǵa arnalǵan jańa mektepter paidalanýǵa berildi. Budan basqa, jyldyń sońyna deiin Aralda 300 orynǵa jáne Qyzylordada 600 orynǵa arnalǵan mektepter salynady. 5 jyldyń ishinde oblysta 45 mektep, onyń ishinde 37-si apattyq mekteptiń ornyna salyndy. Qazirgi tańda aimaqtaǵy orta mektepterdiń 100 paiyzyna keńjolaqty internet tartylyp, elektrondy «Kúndelik» júiesine qosylǵan.
