Qazirgi tańda oblystaǵy mektepterdiń 93,1 paiyzy keńjolaqty internetke qosylǵan. Sonymen qatar, memlekettik jekemenshik áriptestik negizinde 8096 eski kompiýter jańartylyp, zamanaýi pándik kabinetter jáne 3D zerthanalarymen qamtylatyn bolady. Bul týraly Qyzylorda oblysynyń bilim basqarmasynyń basshysy Maira Meldebekova málimdedi.
2018-2019 oqý jylynda 154 559 oqýshy, onyń ishinde 18 942-si birinshi synypqa barady. Jańa oqý jylynyń qarsańynda Qazaly jáne Jańaqorǵan aýdandarynda jańa mektepter paidalanýǵa berildi, jyl sońyna deiin Aral qalasynda 300 oryndyq jáne Qyzylorda qalasynda 600 oryndyq bilim oshaǵy ashylady.
«Oblystaǵy qalǵan bilim oshaqtarynda aǵymdaǵy jóndeý jumystary júrgizildi. Búgingi tańda oblystyń jalpy bilim berý mektepteriniń 93,1 paiyzy keńjolaqty internet jelisine qosylǵan, jyl sońyna deiin qalǵan mektepter tolyǵymen qamtylady. Memlekettik jekemenshik áriptestik sheńberinde bilim uialaryndaǵy 8096 eskirgen kompiýterdi aýystyrý josparlanýda. Budan basqa, 242 mektep elektrondyq jýrnal «Kúndelik» júiesinde jumysyn bastaidy», - dedi bilim basqarmasynyń basshysy.
Aita keteiik, oblys ortalyǵyndaǵy barlyq balabaqshalarda «Elektrondy balabaqsha» júiesi qosylǵan, basqa da mektepke deiingi mekemeler jańa oqý jylynda qosylady.
Jańa oqý jylynan bastap 3,6,8-synyptar jańartylǵan mazmundaǵy bilim berý boiynsha oqidy. Qyryq alty innovatsiialyq mektepte fizika, informatika, himiia jáne biologiia pánderi aǵylshyn tilinde oqytylady. Oblysta 649 muǵalim aǵylshyn tili kýrsynan ótti.
Sonymen qatar, 156 mektep fizika, himiia, biologiia pánderiniń zamanaýi kabinetterimen jabdyqtalýda, 92 mektep robototehnika kabinetterimen, 9 oqýshylar saraiy «3D zerthanalarmen» qamtylady. Qalalyq jáne aýyldyq mektepter deńgeiin teńestirý baǵytyndaǵy sharalar aiasynda shaǵyn jinaqtalǵan mektepter Bilim Book keshenimen qamtylady.
«Ózderińiz biletindei, Jalaǵash aýdany, Shámenov aýylyndaǵy 2018 jyly apattyq dep tanylǵan mektepten basqa oblysta úsh aýysymdyq bilim berý jáne apattyq mektepter joiyldy. Oqýlyqtar men oqý-ádistemelik keshenderdi satyp alýǵa 1,5 mlrd. teńge bólindi. 1 tamyzdan 30 qyrkúiekke deiin «Mektepke jol» dástúrli respýblikalyq qaiyrymdylyq aktsiiasy ótkizilip, onda 4 myńnan astam bala 22 million teńgeden astam qarajat kóleminde kómekke ie boldy», - dedi Maira Meldebekova.
Jańa oqý jylynda «Rýhani jańǵyrý» baǵdarlamasy aiasynda 5-7 synyptar boiynsha «Ólketaný» páni engiziledi. Sondai-aq, biyldan bastap 3-synyptarda «Aqparattyq-kommýnikatsiialyq tehnologiialar» páni engiziletin bolady.
Esterińizge salaiyq, ótken oqý jylynda 7113 mektep bitirýshi túlektiń 4742-si Ulttyq biryńǵai testileýge qatysqan. UBT-nyń ortasha baly 85,2% qurady. 2732 túlek memlekettik bilim berý grantyna ie boldy. Sondai-aq, Qyzylorda oblysy ákiminiń 205 granty, 43 rektor granty, Máskeý men Sankt-Peterbýrgtiń jetekshi joǵary oqý oryndarynyń 70 granty men EýrAzEQ Parlamentaralyq Assambleiasynyń janyndaǵy ýniversitetine 10 grant bólindi. 39 grant áskeri oqýǵa jáne sheteldik ýniversitetterge 29 grant bólingen. Osylaisha, 3 myńnan astam syr boiylyq túlek grant negizinde bilim alady.
