Qyzylordalyq kórshisiniń balalaryn órtten qutqaryp qaldy, dep habarlaidy "Ult aqparat".
Oqiǵa 3 jeltoqsan kúni keshke bolǵan. Kóp qabatty úide turatyn otbasynyń bir ailyq jáne jeti jasar balalary úlkenderdiń baqylaýynsyz qalǵan. Sol sátte 7 jastaǵy búldirshin otpen oinaǵan. Ol kezde ákesi úlken balasyn mektepten alyp qaitýǵa, analary dúkennen nan alýǵa syrtqa shyǵyp ketken.
Páterden shyqqan órtti tómengi qabattaǵy kórshisi Medet Rahmetov alǵashqylardyń biri bolyp baiqaǵan. Ol birden qutqarý qyzmetine habarlasyp, ózi áreket jasaǵan.
«Nátijesinde ol tútin arasynan bir ailyq sábi men 7 jastaǵy balany qutqaryp qaldy. Jedel járdem qyzmeti balalardy oblystyq balalar aýrýhanasyna alyp ketti. Oqiǵanyń mán-jaiy anyqtalýda», - dedi qalalyq tótenshe jaǵdailar departamentiniń órt sóndirý jáne avariialyq qutqarý qyzmetiniń baspasóz hatshysy Áliia Erejepova.
