Qyzylordada jas ónertapqyshtar turǵyndardyń ómir sapasyn jaqsartatyn ári ýaqytty tiimdi basqarýǵa kómektesetin mobildi qosymsha oilap tapty.
Guide Way dep atalatyn bul baǵdarlama Smart City kontseptsiiasy aiasynda júzege asqan. Ony Rlay market nemese App Store mobildi qosymshasy arqyly júktep alýǵa bolady.
Joba avtory Iýrii Kojýshnyidyń aitýynsha, bul ideia Qyzylorda qalasynda tegin anyqtamalyqty qalyptastyrý protsesinen soń paida bolǵan. Mobildi qosymsha qoǵamdyq kólik toqtaityn aialdama ataýy men avtobýs qozǵalysyn anyqtaýǵa kómektesedi. Budan bólek, atalǵan baǵdarlama jergilikti turǵyndarǵa qalanyń geokartasyn kórýge, qajetti kósheni tabýǵa járdemdesedi.
Aimaqta «Aqyldy qala» jobasy boiynsha taǵy bir joba jýyrda iske qosylǵan edi. Ol – «aqyldy arba» qosymshasy, avtory – Qymbat Tursyntai. Atalǵan mobildi baǵdarlamanyń tiimdiligi – sýpermarketterden taýar satyp alý kezinde yńǵaily format usynýy, sondai-aq taýar baǵasyn shtrih-kodtar arqyly bilýge múmkindik berýinde bolyp otyr.
«Meniń jobam ýaqytty únemdeýge jáne turǵyndardyń qarjylyq saýattylyǵyn arttyrýǵa baǵyttalǵan. Máselen, eger azamat tek 10 myń teńgege saýda jasaǵysy kelse, onda oǵan «aqyldy arba» limit tolǵan kezde birden habar beredi», – deidi jas talant Q.Tursyntai.
Biyl Qyzylorda oblysynda 26 IT-joba jasaý josparlanyp otyr. Onyń barlyǵy halyqtyń turmys sapasyn jaqsartýǵa arnalatyn bolady.
Aita keteiik, 2017 jyldyń 12 jeltoqsanynda qabyldanǵan «Tsifrlyq Qazaqstan» memlekettik baǵdarlamasynyń aiasynda «Smart City» kontseptsiiasy qolǵa alyndy. Ondaǵy basty maqsat – qala turǵyndaryn jaily ómirmen qamtamasyz etý, qoǵam ómiriniń barlyq salasyn avtomattandyrý, sol arqyly ómir sapasy men qyzmet sapasyn arttyrý. Memlekettik baǵdarlamaǵa sáikes el aýmaǵyndaǵy barlyq qalalar birtindep aqyldy qalalarǵa ainalady.
