Qyzylorda oblysy Jańaqorǵan kentinde salynyp jatqan №169 N.Ilialetdinov atyndaǵy orta mekteptiń jańa ǵimaratynyń joba qunyna bailanysty áleýmettik jeli betterinde túrli pikirler aitylǵan bolatyn. Osyǵan orai quzyrly oryndar tarapynan júrgizilgen zertteý nátijesi belgili boldy, dep habarlaidy QazAqparat.
Mektep 600 balaǵa arnalǵan. Onyń jobasyn daiyndaýǵa 2018 jyly aýdandyq biýdjetten 14,8 mln teńge qarjy bólingen. Osyǵan sáikes kent ákiminiń sheshimimen B.Baikenjeev kóshesiniń boiynan mektep ǵimaratyn salýǵa jer ýchaskesi bólindi. Bul jer infraqurylymmen tolyq qamtylǵan, №169 N.Ilialetdinov orta mektebiniń eski ǵimaratyna jaqyn ornalasqan. Mektep oqýshylarynyń qatynaýyna da qolaily. Sondai-aq, osy jerge shoǵyrlanǵan 8 myńnan astam turǵyn suranysyn qanaǵattandyrady.
«Mekteptiń jobalaý-smetalyq qujattary ótken jyly memlekettik saraptamanyń oń qorytyndysyna ie boldy. Jobanyń jalpy quny 2,5 mlrd teńgeni quraidy. Alaida, onyń 2,4 mlrd teńgesi qurylys-montajdaý jumystaryna, 23 mln teńgesi avtorlyq qadaǵalaýǵa, sondai-aq 63,5 mln teńgesi tehnikalyq qadaǵalaýǵa qaralǵan. Osy jerde atap ótý kerek, Qazaqstan Respýblikasynyń qurylys normalary jáne erejeleriniń qaǵidalaryna sáikes Jańaqorǵan kenti seismikalyq aimaqqa jatqyzylady. Sondyqtan injenerlik-geologiialyq izdestirý qorytyndysy negizinde mektep ǵimaraty 7 balǵa sáikestendirildi. Nysannyń seismikalyq talaby eskerilgendikten onyń qurylys-montajdaý jumystaryna qosymsha 450 mln teńge eseptelgen. Sonymen qatar, jerasty sýlarynyń joǵary deńgeide bolǵandyǵy da eskerildi. Jobalaý-smetalyq qujattamada 600 mln teńgege jýyq qarjy, jer jumystaryn qoldanystaǵy normativtik-tehnikalyq talaptarǵa sáikestendirý úshin qaralyp otyr. Joǵaryda atalǵan talaptar jobanyń qymbattaýyna ákep soqqanymen, balalar qaýipsizdigi bul jerde birinshi kezekke qoiylyp otyr», - dedi Qyzylorda oblysynyń qurylys, sáýlet jáne qala qurylysy basqarmasynyń basshysy Muhamedisa Álserikov.
Bilim ordasy ornalasqan aýmaqtyń geologiialyq zertteý qorytyndylaryna kúmán bolýyna orai, Qyzylorda oblysynyń qurylys-sáýlet jáne qala qurylysy basqarmasy tarapynan ótken jyldyń qazan aiynda injenerlik-geologiialyq zertteý jumystaryna qaita tapsyrys berilgen. Alaida zertteý nátijesi buryn berilgen geologiialyq zertteýlerdiń qorytyndysymen sáikes kelip, esh qaýip joqtyǵy anyqtalǵan.
Basqarma basshysynyń aitýynsha, ótken jyly atalǵan mektep qurylysynyń qurylys-montajdaý jumystaryn júrgizýge respýblikalyq biýdjetten 500 mln teńge qarjy bólindi. Memlekettik satyp alý konkýrsy jariialanyp, qyrkúiek aiynda qurylys jumystary bastalǵan.
Búgingi kúni qurylysy qarqyndy júrip jatyr. Qurylys-montajdaý sapasy, «Nur Otan» partiiasy oblystyq filialy men tiisti organdardyń qatań baqylaýynda.
