Qyzylorda oblysynda kásibin jańadan bastaǵan úzdik kásipkerlerge 1 mln teńgeden syiaqy berildi, dep habarlaidy "Ult aqparat".
Búgin jappai kásipkerlikti damytý jylynyń qorytyndysy boiynsha keńes ótti. Onda shaǵyn jáne orta biznesti damytýǵa qosqan úlesi úshin kásibin jańadan bastaǵan úzdik kásipkerler marapattaldy. Olarǵa 1 mln teńgeden syiaqy berildi.
Atalmysh shara barysynda Qyzylorda oblysynyń ákimi Qyrymbek Kósherbaev jappai kásipkerlikti damytý arqyly mańyzdy 3 másele sheshilip jatqanyn atap ótti. Osynyń nátijesinde salyq bazasynyń ulǵaiýy, jańa jumys oryndarynyń qurylýy jáne qoǵamdyq-saiasi ahýal turaqtylyǵynyń jaqsarýyna jol ashyldy.
«Bizdiń oblysta ótken jyly jalpy biýdjeti 32 mlrd teńge bolatyn arnaiy «Jol kartasyn» ázirlendi. Bul qarajattyń 3 mlrd teńgeden astam bóligi «Startap» jobalarǵa baǵyttaldy. Al biylǵy jyly ártúrli qarjy kózderinen 34 mlrd teńge qarastyrylyp otyr. Sonymen birge, qaitarymsyz granttar, shaǵyn nesieler men nesielerdi alýdyń qadamdyq is-áreketteri, tiptik biznes josparlardy ázirleýge mán berip otyrmyz. Bul maqsatta jobalardy súiemeldeý úshin árbir aýyldyq okrýgke oblystyq deńgeiden jaýapty laýazymdy tulǵalar bekitildi», - dedi oblys ákimi Qyrymbek Kósherbaev.
Aita keteiik, 2018 jyldyń basynda oblysta 37450 shaǵyn jáne orta biznes nysany bar dep eseptelgen. Qazirgi tańda olardyń sany 42 342-ge jetip otyr. Iaǵni, bir jyl ishinde oblystaǵy jumys istep turǵan shaǵyn jáne orta biznestiń sany 4 892 nysanǵa ulǵaidy.
Keńes qorytyndysy boiynsha «Úzdik jas kásipker», «Úzdik aýyl ákimi», «Úzdik bekitilgen jaýapty tulǵalar» (kýrator) nominatsiialary boiynsha azamattar marapattaldy. Aýdandardan jáne oblys ortalyǵynan isin jańadan bastaǵan 8 úzdik kásipker 1 mln teńgeden aqshalai syiaqy aldy. Al aýyl ákimderi men aýyldyq okrýgterde jappai kásipkerlikti damytýǵa jaýapty laýazymdy tulǵalar qurmet gramotalary men syilyqtarǵa ie boldy.
Syr óńirinde kásipkerlikti qoldaý baǵytynda igilikti ister atqarylyp keledi. Jumys istep turǵan kásipkerlerdi qoldaý jáne kásibin jańadan bastaǵan jas kásipkerlerge jaǵdai jasaý úshin óńirde Kásipkerler úii ashyldy. Oblysta ákimshilik kedergilerdi azaitý boiynsha jumystar jalǵasýda. 2017 jyly respýblika boiynsha Qyzylorda oblysynda alǵash ret oblystyq kásipkerlik jáne týrizm basqarmasy janynan Kásipkerlerge qyzmet kórsetý ortalyǵy quryldy.
Esterińizge sala keteiik, 2018 jyldyń qorytyndysy boiynsha Qyzylorda oblysy biznesti júrgizýge qolaily jaǵdai jasaǵan eń úzdik oblys dep tanyldy.
