Qyzylorda oblysy aýmaǵynda Syrdariia boiynda sý tasqyny qaýpi oryn alyp otyr. Qazir oblysta bul baǵytta aldyn alý sharalary júrgizilip keledi, dep habarlaidy "Ult aqparat".
Syrdariia ózeniniń basym bóligi Qyzylorda oblysy aýmaǵynan ótedi. Dariianyń Syr óńirindegi uzyndyǵy 1274 shaqyrymdy quraidy. Joǵary bólikten Shardara sý qoimasyna sekýndyna 900 tekshemetr sý quiylýda. Qazirgi tańda sý qoimasynda 3,2 mlrd tekshemetr sý jinalǵan. Ol byltyrǵy jylǵy dál osy kezeńmen salystyrǵanda 1,5 mlrd tekshemetrge artyq. Sý qoimasynan tómengi bólikke sekýndyna 650 tekshemetr sý bosatylsa, oǵan Arys ózeninen 10 tekshemetr sý qosylady.
«Qyzylorda oblysy aýmaǵyna sekýndyna 571 tekshemetr kelip jatyr. Qyzylorda qalasy tusyndaǵy sý torabynan 475 tekshemetr sý aǵyp jatsa, ol Qazaly aýdanynda 420, dariianyń teńizge quiatyn tusyndaǵy Aqlaq sý torabynda 260 tekshemetrdi quraidy. Qazirgi tańda oblystyń ońtústigindegi Jańaqorǵan aýdanynda dariia beti taza, eshqandai muz ustasý baiqalyp otyrǵan joq. Ol Shieli aýdanynyń Mailytoǵai eldi mekeni tusyna deiin de dál osyndai jaǵdai kórinis berip otyr. Al Qyzylorda qalasy tusyndaǵy 4 aýmaqta muz ustasqan. Al Syrdariia, Jalaǵash aýdandarynda muzdyń qalyńdyǵy 5-10 santimetr bolsa, ol Qarmaqshy, Qazaly, Aral aýdandarynda 10-15 santimetrge deiin jetedi. Oblysta aýa raiy qazirgidei bolyp jatsa, qańtar aiynyń alǵashqy on kúndigine deiin muzdyń ustasýy Shieli kentine deiin kórinis beredi degen josparymyz bar», - dedi QR Qorshaǵan orta jáne sý resýrstaryn paidalanýdy retteý jáne qorǵaý jónindegi Aral-Syrdariia basseindik inspektsiiasynyń basshysy Ádilhan Qarlyhanov.
Syr óńirinde eki jaǵalaýyn qosa eseptegende barlyǵy 609,4 shaqyrym qorǵanys bógeti bar. Biyl oblys kóleminde sý tasqynynyń aldyn alý maqsatynda jalpy uzyndyǵy 40 shaqyrymdy quraityn ózen boiy qorǵanys bógetteriniń 31 ýchaskesinde jóndeý-qalpyna keltirý jumystary júrgizildi.
«Oblys aýmaǵynda qorǵanys bógetteriniń qaýipti dep sanalatyn tustary 56 sý basý aimaǵyna bólingen. Oǵan 111 jaýapty mekeme bekitilgen. Sý tasqynynyna qarsy paidalanylatyn janarmai qory jáne ózge de dúnieler saqtalyp otyr. Sondai-aq, 17850 baý qamys jáne basqa da qajetti materialdar qory jasaqtalǵan. Sonymen qatar, Qyzylorda qalasy men aýdandarda tasqyn sý kezeńinde halyqty kóshirýge arnalǵan evakýatsiialyq jinaqtaý jáne qabyldaý beketteri daiyndyqqa keltirilgen. Joǵarydan keletin sý kólemin qaýipti mólsherden asyrmaý maqsatynda Sý resýrstary komitetimen kelisilgen. Sonyń nátijesinde Shardara men Kóksarai sý qoimalarynan tómenge bosatylatyn sý kóleminiń kestesi bekitildi. Búgingi tańda Syrdariia ózeni arnasynda muz ustasý protsesi júrýine bailanysty oblystyń azamattyq qorǵaý qyzmetteri kúsheitilgen rejimge keltirilgen», - dedi Qyzylorda oblystyq jumyldyrý daiyndyǵy basqarmasy basshysynyń orynbasary Ǵabit Jańabaev.
2019 jyldyń qańtar aiynyń alǵashqy aptasynda Shardaradan tómengi bólikke sekýndyna 900 tekshe metr sý bosatylady dep josparlanyp otyr. Onyń 500 tekshemetri Kóksarai sý rettegishine jiberiledi.
Búgingi kúni Syrdariia ózeni arnasyndaǵy sý sharýashylyǵy nysandarynyń jaǵdaiy birqalypty dep baǵalanyp otyr.
Esterińizge sala ketelik, budan buryn Qyzylorda oblysy Qazaly aýdany aýmaǵynda dariia boiyndaǵy qorǵanys bógeti jaryldy. Odan keiin Qazgidromet Syrdariia arnasynan shyǵyp ketýi múmkin ekenin habarlady.
