Qyzylorda oblysynda sońǵy bir aptada 144 adam koronavirýs juqtyrdy. Mundai ósim kórsetkishi sanitariialyq talaptardyń saqtalmaý saldarynan tirkelgen, dep habarlaidy "Ult aqparat".
Oblysta biylǵy jyldyń 28 naýryzy men 3 maýsymǵa aralyǵynda koronavirýs infektsiiasynyń 449 deregi anyqtaldy. Onyń 220 jaǵdaiy nemese 49% tótenshe jaǵdai alynǵannan keiingi bir aiǵa tolmaityn ýaqytta tirkelip otyr.
Al 27 mamyr-2 maýsym aralyǵynda aýrý sany eń joǵary kórsetkishke jetip, bir aptada 144 jaǵdai tirkeldi.
«Bir oshaqtan 56-60 aýrý jaǵdaiy tirkelgen derekter kezdesti. Mundai ósim kórsetkishi sanitariialyq talaptardyń saqtalmaý saldarynan tirkelýde. Sońǵy kúnderde oblysta tótenshe jaǵdai alynyp, karantin talaptary jeńildetildi. Halyqtyń tynys-tirshiligine qajetti salalar men nysandar kezeń-kezeńimen iske qosyldy.
Jaz mezgiliniń aptap ystyǵynda halyqty shekteýde ustaý múmkin emes. Degenmen shydamdylyq tanytyp oqshaýlanýdyń qarapaiym erejelerin epidemiologiialyq ahýal turaqtanǵansha ustaǵanymyz jón. Búgingi kúrdeli epidemiologiialyq ahýal áli de bolsa merekelik sharalardy, jiyn-toilardy, oiyn-saýyqtardy, toptasyp qydyrýdy doǵara turýdy talap etedi», - dedi Qyzylorda oblysynyń taýarlar men kóretiletin qyzmetterdiń sapasy men qaýipsizdigin baqylaý departamentiniń basshysynyń orynbasary, oblystyń bas memlekettik sanitariialyq dárigeri Áliia Ábdiqaiymova.
Oblystyń bas sanitarynyń aitýynsha, sanitarlyq-gigienalyq talaptardy buljytai oryndaǵanda ǵana bul infektsiiany turaqtandyrýǵa bolady. Oblysta tirkelgen aýrýdyń 80-90% jeńil, klinikalyq belgilerinsiz ótýde. Biraq bul jaqsy kórsetkish dep aita almaimyz. Sebebi, klinikasyz júrgen adamdar virýs tasymaldaýshylary bolyp sanalady. Otbasyndaǵy, ujymdaǵy jalpy qoǵamdaǵy immýniteti tómen adamdar úshin úlken qaýip tóndiredi.
«Oǵan dálel búgingi kúngi jansaqtaý bóliminde aýyr halde em alyp jatqan azamattar. Tasymaldaýshy patsient «D» esepte turǵan, egde jastaǵy adamdar, bosanǵan nemese júkti áielder men balalar úshin aýrý kózi bolyp tabylady.
Jalpy koronavirýs infektsiiasynyń birneshe túri bar. Sonyń ishinde etiologiiasy belgisiz bolyp otyrǵan jańa COVID-19 qozdyrǵyshy osy atalǵan toptyń basqa túrlerine qaraǵanda qorshaǵan ortada ystyqqa da, qatty sýyqqa da tózimdi. Sol sebepti infektsiianyń merzimdik kóterilý nemese túsýine esh áserin tigizbei otyr. Sondyqtan oqshaýlaý tártibi, sanitariialyq-gigienalyq erejeler saqtalmaǵan jaǵdaida bul infektsiiany aýyzdyqtaý múmkin emes», - dedi ol.
