Eki márte Sotsialistik Eńbek Eri, dańǵaiyr diqan Ybyrai Jaqaevtyń 125 jyldyǵy aiasynda 23 qazan kúni Qyzylordada 13 million teńgeden astam júlde qoryn quraityn at báigesiniń aqtyq saiysy ótti. Elimizdiń túkpir-túkpirinen kelgen ondaǵan shabandoz báigeniń 5 túrinen synǵa tústi, dep habarlaidy "Ult aqparat" Baq.kz portalyna silteme jasap.
Oblys ákimi Qyrymbek Kósherbaev jinalǵan jurtshylyqty egin jinaý naýqanynyń aiaqtalýymen jáne dala akademiginiń mereitoiymen quttyqtap, shabandozdarǵa sáttilik tiledi.
«Sońǵy jyldary ulttyq sport túrleriniń oblysymyzda buqaralyq sipat alyp kele jatqany qýantady. Aimaqta 14 myńnan astam adam etnosporttyń 7 túrimen shuǵyldanady. Jyl saiyn oblysymyzda ótkiziletin «Altyn belbeý» týrniri respýblikadaǵy eń tanymal ári bedeldi básekeniń birine ainaldy. Sondai-aq, biylǵy jyly kókpardan Jańaqorǵan aýdanynda ótken 5-shi Qazaqstan chempionatynda oblysymyzdyń qurama komandasy tuńǵysh ret qatysyp, ekinshi oryndy jeńip aldy. Kókpardan oblystyń jasóspirimder qurama komandasy eki márte kúmis júldeni ielendi. Byltyr ulttyq sportty damytý maqsatynda salynǵan ippodrom halyqaralyq jarystardy ótkizýge jáne óńirde at sportynyń órkendeýine múmkindik beredi»,- dedi aimaq basshysy.
At báigesiniń qorytyndysy tómendegidei:
Kókpardan Jańaqorǵan aýdanynyń komandasy jeńiske jetip, 2 million teńgeni ielendi.
Ekinshi oryndy jeńip alǵan shielilikterge 1,5 million teńge berildi.
Úshinshi oryndy qanjyǵasyna bailaǵan Qyzylorda qalasynyń shabandozdary 500 myń teńgemen jáne tórtinshi oryndy jeńip alǵan araldyqtar 250 myń teńgemen marapattaldy.
«Teńge ilý» saiysynda birinshi oryndy (100 myń teńge) jańaqorǵandyq Altai Qońqaev ielendi. Ekinshi oryndy (75 myń teńge) jalaǵashtyq Dosbol Nurhan jeńip alsa, úshinshi oryndy (50 myń teńge) qyzylordalyq Janbolat Áliqojaev ielendi.
«Qunan báigede» Almaty oblysynan kelgen Janqoilyqovtar áýletiniń «Qaratóbeli» jeńiske jetti. Shabandoz – Ótegen Aitbek. Birinshi oryn úshin olar 1 million teńge aqshalai syilyq ielendi.
Ekinshi oryn men 500 myń teńgeni qyzylordalyq Igenbaev Daneldiń «Elik» atty tulpary jeńip aldy. Shabandoz – Emil Igenbaev. Al úshinshi orynǵa laiyq dep tanylǵan «Alataý» sáigúliginiń iesi almatylyq Aibek Bahytbekke 300 myń teńge berildi. Shabandoz – Elshat Baimuhanov.
«Toq báigede» birinshi oryn men 1,5 million teńge aqshalai syilyqqa Shieli aýdanynan kelgen Mailybaevtar otbasynyń «Patsha» tulpary laiyq dep tanyldy. Ekinshi oryn men 1 million teńgeni astanalyq Nurdáýlet Mirastyń «Shaikúreńi» jeńip aldy. Úshinshi oryndy ielengen Janqoilyqovtar otbasynyń «Altynqozysyna» 500 myń teńge aqshalai syilyq tabystaldy.
«Alaman báige» saiystyń eń kúrdeli túri, shart boiynsha 25 shaqyrym qashyqtyqty baǵyndyrý kerek. «Alaman báigede» taldyqorǵandyq Jeńis Smaiylovtyń «Baqtorysyn» tizgindegen Aqjol Jumatai úzdik shabandoz dep tanyldy. Jeńimpazǵa jol talǵamaityn kólik kilti tabystaldy. Al ekinshi oryn tarazdyq Melebek Nurdáýletke buiyrdy. «Batyr» atty tulpardyń iesi – Asqar Oljabaev. Úshinshi oryn men 1 million teńge aqshalai syilyq shyǵysqazaqstandyq Erlan Súleimenovtyń «Mirad» tulparyn tizgindegen Nurlan Jaqsylyqqa buiyrdy. Tórtinshi oryn úshin 500 myń teńgeni almatylyq Serik Baqievtyń «Nurtorysy» ielendi. Shabandoz – Arnur Qurmanjan.
