Qyzylorda qalasynda eńbek kúni merekesi qarsańynda «Ata kásip-altyn mura» atty V oblystyq eńbek sabaqtastyǵy forýmy ótti.
Qyzylorda oblysynyń ákimi Qyrymbek Kósherbaev bul forýmnyń 2013 jyldan bastap ótkizilip kele jatqanyn atap ótti.
«Elbasynyń Jarlyǵymen bekitilgen «Eńbek kúni» merekesin biyl besinshi ret atap ótip otyrmyz. Osy ýaqyt aralyǵynda kásipti atadan balaǵa miras etip otyrǵan qanshama otbasylardy oblysta ǵana emes, respýblika kóleminde tanyta bildik. Bizdiń búgingi jas urpaǵymyz atakásipti jalǵastyryp, onyń qyr-syryn otbasynan úirense, ári qarai jalǵastyrsa, munyń ózi bir tárbie mektebi emes pe. Sonyń nátijesinde ózderińiz siiaqty eńbek áýletteri qalyptasyp jatsa, bul da bir ultymyzdyń rýhani jańǵyrýy bolmaq»,-dedi aimaq basshysy.
Sonymen qatar, forým aiasynda «Eńbek joly» respýblikalyq baiqaýynyń jeńimpazdary, kásipodaq uiymdarynyń úzdik jas mamandary jáne ártúrli saladaǵy jastardyń úzdik tálimgerleri belgili boldy.
Atap óteiik, aimaqtyń úzdik eńbek áýletteri salalar boiynsha anyqtalyp, baǵaly syilyqtarmen marapattaldy.
Bilim berý salasy boiynsha Qazaly aýdany Seksenbaevtar otbasy úzdik dep tanyldy. Otbasynyń jalpy jumys ótili - 305 jyl.
Mal sharýashylyǵy salasynyń úzdigi - Jalaǵash aýdanynyń Oinarovtar áýleti. Saladaǵy eńbek ótilderi 142 jyldy quraidy. Áýlettiń úlkeni Oinarov Sailaýdyń osy saladaǵy eńbek ótili - 40 jyl. Búgin de ol kisi - Aqqyr aýylynyń órkendeýine zor úles qosqan qurmetti aýyl aqsaqaly.
Syrdariia aýdanynyń Sádýaqasovtar áýleti mádeniet salasy boiynsha úzdik shyqty. Ónerli otbasynyń jalpy eńbek ótili 166 jyldy quraidy. Otbasynyń 7 ónerpazy mýzyka mamandary bolyp tabylady. Áýlettiń úlkeni Sansyzbai Sádýaqasov - osy salada 50 jyl eńbek etken óner iesi.
Aýylsharýashylyǵy salasynda Aral aýdanynyń Berdimaǵanbetovter áýleti jeńimpaz atandy. Otbasynyń jalpy eńbek ótili 257 jyldy qurasa, áýlettiń úlkeni Tórehan Berdimaǵanbetov osy salada 35 jyl eńbek etken.
Egin sharýashylyǵy salasynyń úzdigi – Jańaqorǵan aýdanynyń Kóketovter áýleti. Otbasyndaǵy 6 adamnyń sala boiynsha eńbek ótili - 58 jyl. Áýlettiń úlkeni Balǵynbai Kóketovtyń óz eńbek ótili 22 jyldy quraidy.
