Qyzylordada terrorlyq akti saldarynan oblys ákimdigi ǵimaratynyń 1-3 qabatyna zaqym kelgen, dep habarlaidy QazAqparat.
Ákimdik ǵimaratynda esik-terezelerdi syndyrý, ofistik tehnikalardy urlap ketý, qyzmettik avtokólikterdi órteý áreketteri bolǵan. Jalpy 1-3 qabattaǵy kabinetterge zaqym kelgen.
Búgin oblys ákimi Gúlshara Ábdiqalyqova terrorlyq akti saldarynan zaqymdanǵan ákimshilik ǵimarattardy aralap, nysandardy qalpyna keltirý jumystaryn saralady.
Jappai tártipsizdik saldarynan Qyzylorda qalasy ákimdigine zalal keldi. Atalǵan nysannyń esik-terezesi synǵan. Qalalyq ákimdik 7 qańtardan beri qalypty jumys rejimine kóshken.
Terrorister ortalyq alańdaǵy ákimshilik nysandarǵa aitarlyqtai zalal keltirilgen. Oblys ákimi Nur Otan partiiasynyń oblystyq filialynda terrorlyq áreket saldaryn joiý boiynsha jasalyp jatqan jumystardy kórdi. Nysannyń 45 paiyzy órtke oranyp, múlkine zalal kelgen. Qazirde shyǵyn kólemi eseptelip jatyr.
Al, terroristik áreket saldarynan oblystyq sot ǵimaratynyń 460-qa jýyq qural-jabdyǵy men 300-den astam keńse tehnikasy jaramsyz kúige túsken. Qazir ǵimaratty tazalaý men qalpyna keltirý jumystary qolǵa alynǵan.
Óńir basshysy jóndeý jumystarynyń júrgizý jáne shyǵyn kólemi naqty dáleldi eseptemelermen, qujattarmen rastalýy kerektigin tilge tiek etti.
«Tótenshe jaǵdai rejimine bailanysty zalal keltirilgen ǵimarattarǵa Úkimet rezervinen qajetti qarajat bólinedi. Ol aldaǵy ýaqytta belgili bolady. Al oǵan deiin biz daiyndyq jumystaryn júrgizip, keltirilgen shyǵyn kólemin naqtylap jatyrmyz. Qajetti soma bólingen soń, qaita qalpyna keltirý jumystaryn bastaimyz. Jalpy 8 ákimshilik ǵimarattyń shyǵyn kólemi 6 mlrd teńge kóleminde esepteldi.
Aimaqtaǵy biznes ókilderiniń shyǵyndaryn óteý jóninde memleket mindetteme aldy. Terrorlyq akti saldarynan oblysta 15 kásipker sýbektisine ziian kelip, onyń kólemi shamamen 395 million teńgeden asty. Biraq basty printsip – shynaiylyq bolý kerek. Shyǵyn kólemi naqty qujattarmen rásimdelýi tiis», - dedi Gúlshara Ábdiqalyqova.
Munan soń, aimaq basshysy qalalyq politsiia basqarmasynyń ǵimaratynda bolyp, qalpyna keltirý jumystarynyń barysyn saralady.
