Qyzylordada Alash qozǵalysynyń qairatkeri, Túrkistan ólkesi halyqtarynyń azattyq kúresi jetekshileriniń biri Mustafa Shoqai eskertkishi ashyldy, dep habarlaidy Baq.kz tilshisi.
Eskertkishtiń ashylý saltanatyna Qyzylorda oblysynyń ákimi Qyrymbek Kósherbaev qatysty.
«Mustafa Shoqai Eýropa topyraǵyna taban tirep turyp, álemdik saiasatqa qazaqtyń únin jetkizgen alǵashqy Alash qairatkeri edi. Ol kez kezgen tarihi qubylys sekildi bir jaqty sipattaýǵa bolmaityn, úirenshikti qalypqa salýǵa kelmeitin tulǵa. Mustafa Shoqai sol zamandaǵy asa kúrdeli ǵalamdyq tarihi protsestiń bel ortasynda júrip, túrki áleminiń, óz ultynyń múddesin qorǵaýǵa tyrysty. Sondyqtan, ol aq pen qyzylǵa, ne qońyr jaq, bolmasa qarsy boldy degen qarabaiyr túsinikke syimaidy. Mustafa Shoqai búkil ómirin, qajyr-qairatyn, aqyl-oiyn halqynyń, túbi bir túrki jurtynyń órkendeýine arnady», – dedi oblys ákimi.
Sonymen qatar, aimaq basshysy 2015 jyly M.Shoqaidyń 125 jyldyǵyn Syr jurtshylyǵy atap ótkenin, óziniń týǵan jeri Sulýtóbede qairatkerdiń eskertkish-biýsti qoiylǵanyn, mádeniet úiin salǵanyn jetkizdi.
«Sol mereitoi aiasynda qairatker ári kúresker tulǵanyń eńseli eskertkishin oblys ortalyǵy Qyzylordada ornatý máselesi qoldaý tapqan bolatyn. Mine, búgin memlekettik komissiia tarapynan úzdik tanylǵan, Qazaqstan Sýretshiler odaǵynyń múshesi, músinshi Kósher Baiǵazievtiń jobasy Qyzylorda qalasynda ornatylyp otyr», - dei kele oblys ákimi Mustafa Shoqaidyń beinesin jasaǵan músinshilerge alǵysyn bildirdi.
Budan bólek, saltanatty rásimde ǵalym, filosofiia ǵylymdarynyń doktory Dosmuhamed Kishibekov búgin el arysy Mustafa Shoqaidyń armanynyń oryndalyp, halqymen qaýyshqan kúnimen kópshilikti quttyqtady.
«Qairatker halyq úshin janyn pida etti. Al búgin onyń ózi kelmese de, rýhy keldi. Táýelsizdikpen birge eńbekteri oraldy. Mustafanyń atqarǵan qyzmetine, basynan ótkergen qiyndyqtaryna qarap, onyń er ekenin tanisyń. Shetelde jýrnal shyǵaryp, álemge pikirin taratty. Bul eshkimniń qolynan kelmeidi. Ashylǵan eskertkish qutty bolsyn, urpaq tárbiesine mol paidasyn tigizsin», - dedi ǵalym.
Aita ketkón jón, qoǵamdyq jáne saiasi qairatker Mustafa Shoqaidyń eskertkishine oblys qazynasynan 49 million 346 myń teńge bólingen.
Sondai-aq, búgin Qyzylorda qalasynda «Alash murasy jáne táýelsiz Qazaqstan» atty halyqaralyq ǵylymi-teoriialyq konferentsiia ótip jatyr. Oǵan elimizdiń ár túkpirinen kelgen ǵalymdar men qoǵam qairatkerleri qatysýda.
