Qyzylordada 111 adam meditsinalyq baqylaýda. Bul týraly oblystyq taýarlar men kórsetiletin qyzmetterdiń sapasy jáne qaýipsizdigin baqylaý departamenti basshysynyń orynbasary Áliia Ábdiqaiymova aitty, dep habarlaidy QazAqparat.
«Koronavirýs infektsiiasynyń taralýyna jol bermeý baǵytynda jumystar júrgizilip jatyr. Olardyń 87-i úi karantininde. Al 24-i provizorlyq statsionarda karantinge alynyp, 14 kúnge meditsinalyq baqylaýǵa alyndy. Búgingi kúni oblys boiynsha koronavirýstyń naqtylanǵan bir jaǵdaiy tirkeldi. Bul jaǵdai boiynsha barlyq saqtyq sharasyn qoldana otyryp, naýqas oblystyq juqpaly aýrýhananyń boks bólimine jatqyzyldy», - dedi ol «Habar 24» arnasynda onlain rejimde ótken baspasóz máslihatynda.
Qazir oblysta epidemiologiialyq jáne dezinfektsiialyq eki top qurylǵan. Iaǵni aýrý tirkelgen oshaqta qorytyndy dezinfektsiia jumystaryn júrgizý maqsatynda aldyn alý sharalary júrgizilýde.
«Naýqaspen qarym-qatynasta bolǵan adamdardyń sheńberi - qarym-qatynasta bolǵan 30-ǵa jýyq adam anyqtaldy. Endi olarǵa irikteý jumystary júrgiziledi. Iaǵni, jaqyn jáne potentsialdy qarym-qatynasta bolǵan adamdar anyqtalyp, 14 kúnge statsionarǵa jatqyzylady. Biz saqtyq sharalaryn kúsheitýimiz kerek», - deidi Áliia Ábdiqaiymova.
Qyzylorda oblysynda úlken saýda ornynda, dúkender men minimarketterde, adam kóp shoǵyrlanatyn oryndardyń bárinde dezinfektsiialyq sharalar kúsheitilip, kúnine eki ret júrgizilmek. Kóshege turǵyndar shyqqanda mindetti túrde maskamen júrýi kerek.
«Bizdiń beretin nusqaýymyz – úide qalý, kópshilik bolyp jinalmaý, úige keletin qonaqty azaitý kerek», - dep túidi ol.
