Búgin Qyzylorda oblysynda taǵy úsh adam koronavirýs juqtyryp, olardyń jalpy sany 5-ke jetti.
Oblystyq densaýlyq saqtaý basqarmasynyń basshysy Jaqsylyq Abdýsametov naýqastardyń jaǵdaiy jaiynda jýrnalistermen ótken brifingte aityp berdi, dep habarlaidy "Ult aqparat".
Budan buryn atalǵan aýrýǵa bailanysty 2 jaǵdai tirkelgen bolatyn. Endi olardyń qataryna taǵy úsheýi qosylyp otyr. Búgingi tirkelgen derek laboratoriialyq zertteýler arqyly naqtylandy.
«Búgin tirkelgen úsh naýqastyń bireýi budan burynǵy eki naýqaspen qarym-qatynasta bolǵan. Qazir Jańaqorǵan aýdanaralyq aýrýhanasynda em qabyldap jatyr. Onyń jaǵdaiy ortasha aýyr dep baǵalanyp otyr. Onyń shaǵymy - jalpy álsizdik jáne dene qyzýynyń kóterilýi. Ekinshi naýqas 20 naýryzda naýqas AQSh-tan kelgen. Ol 1V sanatyna engizilgen memleket bolǵandyqtan úi karantinine alynǵan edi. Keshe dene qyzýy kóterildi. Juqpaly aýrýlar aýrýhanasyna jatqyzyldy. Alynǵan analizi oń nátije kórsetti. Onyń jaǵdaiy qanaǵattanarlyq, ol dene qyzýynyń kóterilýine shaǵymdanady. Úshinshi azamat Qyzylorda qalasynda turady. Onyń dene qyzýynyń kóteril, ýlaný simptomdary baiqalyp, denesinde bórtpe paida bolǵan. Oblystyq juqpaly aýrýlar aýrýhanasynda zertteý júrgizilip, diagnozy naqtylandy. Ol osy ýaqytqa deiin qyzylsha aýrýy boiynsha shaǵymdanǵan edi. Jaǵdaiy ortasha aýyr dep baǵalandy. Qazirgi tańda bekitilgen hattamaǵa sáikes, naýqastardyń emi júrgizilýde. Qyzylshamen aýyryp túsken naýqastyń jaǵdaiy keshegi kúnge qaraǵanda jaqsaryp keledi», – dedi Jaqsylyq Abdýsametov.
Onyń aitýynsha, Qyzylorda qalasy men oblysty karanige jabý máselesi qaralýda. Naqty sheshim keiin belgili bolady.
Budan buryn Qyzylordada 28 naýryzda koronavirýs juqtyrǵan alǵashqy adam tirkelse, 29 naýryzda ol naýqaspen qarym-qatynasta bolǵan medbikeden de sol diagnoz naqtylandy.
