Búginnen bastap Qyzylorda qalasyndaǵy barlyq dárihanaǵa 3 myń dana kóp márte paidalanýǵa jaraityn betperde jetkiziledi, dep habarlaidy "Ult aqparat".
Qyzylordada oblys ákiminiń orynbasary Naýryzbai Baiqadamov koronavirýstan saqtaný sharalaryna orai jedel otyrys ótkizdi. Mamandardyń aitýynsha, koronavirýstan qorǵanýdyń bir tásili – únemi betperde taǵyp júrý. Degenmen, dál qazir dárihanada betperde tapshylyǵy baiqalǵan.
Arnaiy otyrysqa qatysqan oblystyq kásipkerlik basqarmasy, oblystyq densaýlyq saqtaý basqarmasy, Taýarlarmen kórsetiletin qyzmetterdiń sapasy men qaýipsizdigin baqylaý departamenti, «Atameken» kásipkerler palatasy, «DalaTex» tigin fabrikasy ókilderi men jeke dárihana ieleri bir sheshimge keldi.
Onda qazirgi ýaqytta tigin fabrikasynda tigilip jatqan segiz qabatty kóp retti paidalanýǵa jaraityn jeke qorǵanysh betperdesin, Qyzylorda qalasy jáne aýdandardaǵy dárihanalarǵa jetkizý qolǵa alynady.
Búginnen bastap barlyq dárihanaǵa 3 myń danasy jetkiziledi. Ári qarai suranysqa qarai 5 myń danaǵa jetkizý jospary bar. «DalaTex» tigin fabrikasy ókiliniń málimdeýi boiynsha, kelesi aptadan bastap arnaiy qondyrǵynyń kómegimen bir rettik jeke qorǵanysh betperdesi shyǵaryla bastaidy.
