Foto: «Ózenmunaigaz» AQ baspasóz qyzmeti
Qyzylorda oblysynda ken ornynda jumys ýaqytynda qaitys bolǵan marqumnyń áieli kompaniiadan 6 mln teńge moraldyq shyǵyn óndiretin boldy, dep habarlaidy Qyzylorda qalalyq sotynyń baspasóz qyzmeti.
Marqum jergilikti aktsionerlik qoǵamnyń birinde operator qyzmetin atqarǵan. Qyzylorda qalasynyń turǵyny jumys ýaqytynda ken ornynda qaitys bolǵan.
Bul maqsatta oblystyq eńbek salasyndaǵy baqylaý basqarmasy tekserý júrgizdi. Mamandar qorytyndyǵa sáikes, jazataiym oqiǵa eńbek mindetterin oryndaý kezinde bolǵan degen tujyrymǵa keldi. Jumys berýshiniń kinási tolyqtai dáleldendi.
Qaitys bolǵan jumysshynyń artynda áieli men kámeletke tolmaǵan úsh balasy qalǵan. Asyraýshysynan aiyrylǵan áiel Qyzylorda qalalyq sotyna júginip, moraldyq ziian óndirýdi suraǵan.
«Sotta aktsionerlik qoǵam marqumnyń otbasyna kómek berilip, saqtandyrý shartyna sáikes marqumnyń áieliniń esepshotyna aqsha aýdarylǵanyn kórsetti. Sot otyrysynda barlyq dáleldeme zerdelendi. Jumys berýshiniń kinásinen otbasynyń jalǵyz asyraýshysy bolǵan jumysshynyń qaza tapqany anyqtalǵan. Qyzylorda qalalyq soty áieldiń talap qoiýyn qanaǵattandyryp, aktsionerlik qoǵamnan áieldiń paidasyna 6 mln teńge moraldyq ziian óndirý týraly sheshim shyǵardy», - dep málim etti Qyzylorda qalalyq sotynan.
Eske salsaq, budan buryn Qyzylorda oblysynda zańsyz mazýt satqan eki kásipker jazaǵa tartyldy.
