Búgin Qarttar kúni merekesi qarsańynda «Grand Plaza» meiramhanasynda eńbek jáne soǵys ardagerleri men aimaqtyń qoǵam qairatkerlerine arnalǵan merekelik dastarhan jaiyldy.
Qyzylorda oblysynyń ákimi Q.Kósherbaev jiylǵan qonaqtardy quttyqtap, zor densaýlyq pen uzaq ǵumyr tiledi.
«Búginde oblysymyzda 70 myńǵa jýyq zeinet jasyndaǵy qariialarymyz bar. Olardyń áleýmettik máseleleri bizdiń udaiy nazarymyzda. Osy oraida, aimaqtaǵy egde jastaǵy azamattar úshin laiyqty ómir súrý sapasyn arttyrýdyń 2018-2020 jyldarǵa arnalǵan keshendi josparyn qabyldadyq. Josparǵa sáikes egde jastaǵy azamattardy áleýmettik qorǵaýǵa, densaýlyǵyn jaqsartýǵa, qoǵamdyq ómirge tartýǵa, kompiýterlik saýattylyǵyn arttyrýǵa baǵyttalǵan sharalar júrgizilýde»,-dedi aimaq basshysy.
Sóz sońynda aimaq basshysy memleket jáne qoǵam qairatkeri, oblystyq Ardagerler keńesiniń tóraǵasy qyzmetin atqarǵan Seiilbek Shaýhamanovty bir minýt únsizdikpen eske aldy.
Sondai-aq, jinalǵan kópshilikti eńbek ardagerleri Orazbai Ábishev pen Turǵanbai Mahanov ta quttyqtady.
Atap óteiik, qazirgi tańda, Qyzylorda qalasynda 150 oryndyq múmkindigi shekteýli jandarǵa arnalǵan oblystyq qarttar úiiniń janynan 100 oryndyq jáne qalalyq ardagerler úiiniń janynan ashylǵan 50 oryndyq ońaltý ortalyǵy jumys isteidi. Al, Shieli aýdanyndaǵy 50 oryndyq ardagerler men múmkindigi shekteýli adamdarǵa arnalǵan kúndizgi statsionar jaǵdaiynda ońaltý bólimderinde 3 myńǵa jýyq adamǵa qyzmet kórsetiledi. Sonymen qatar, oblysta birneshe jyldan beri «Syr meiirimi» jobasy júzege asyp keledi. Bul jobaǵa oblystyq biýdjetten qarjy bólinip, kómekke muqtaj 250 jalǵyzbasty qart pen múmkindigi shekteýli adamǵa, az qamtylǵan jandarǵa túski astar uiymdastyryldy. Sondai-aq, 250 ardager «Astana EKSPO-2017» halyqaralyq mamandandyrylǵan kórmesin tamashalap qaitqan bolatyn.
