Qyzylorda oblysynda biyl 4 adam Kongo-Qyrym gemorragiialyq qyzbasynan qaitys boldy, dep habarlaidy QazAqparat.
Óńirde Kongo-Qyrym gemorragiialyq qyzbasynyń epidemiologiialyq ahýaly órship tur. Oblys boiynsha 33 naýqas tirkelip, onyń 14-i naqtylanǵan. Ókinishke qarai 4 adam kongo-qyrym gemorragiialyq qyzbasynan kóz jumdy. Qaitys bolǵan naýqastar – Qyzylorda qalasy, Jalaǵash, Shieli aýdandarynyń turǵyndary.
«Qazirgi tańda Kongo-Qyrym gemorragiialyq qyzbasymen aýyryp, 1 naýqas em alýda. Tiisti meditsinalyq em sharalary qoldanylǵan 9 naýqas qanaǵattanarlyq jaǵdaida úilerine shyǵaryldy. Kongo-Qyrym gemorragiialyq qyzbasyn boldyrmaý, aldyn alý sharalary da kóptep júrgizilýde», – dedi oblystyq densaýlyq saqtaý basqarmasy basshysynyń orynbasary Jangeldi Myrzageldiuly.
Byltyr kene shaǵýdyń 238 jaǵdaiy anyqtalsa, biyl 601 deregi tirkelgen. Sonymen qatar kenelerdiń arasynda aýrý qozdyrǵyshynyń anyqtalýy da ótken jylǵydan joǵary.
Byltyr oblys boiynsha 113 eldi meken qolaisyz aimaqtar qatarynda eseptelse, biyl olardyń sany 116-ǵa jetti.
«Biyl Kongo-Qyrym gemorragiialyq qyzbasynyń jańa mikrooshaqtaryn anyqtaý maqsatynda 40 075 dana kene jinalyp zertteldi. Onyń ishinde 5174-i – eldi mekenderden, 16 765-i – janýarlardan, 17637-si – tabiǵattan, 496-sy aýrý oshaqtarynan jinalǵan. Barlyǵy 4527 synama zerttelip, 127-sinen oń nátije anyqtalǵan. Oblys boiynsha meditsinalyq mekemelerde KQGQ-men aýyratyn naýqastardy emdeý úshin virýsqa qarsy preparattar, immýndalǵan plazma jáne t.b. qajetti dári-dármekter men qorǵanys qural-jabdyqtar qory jetkilikti mólsherde bar», – dedi oblystyq sanitariialyq-epidemiologiialyq baqylaý departamenti basshysynyń orynbasary Áliia Ábdiqaiymova.
Aita keteiik, epidmaýsymnyń bastalýyna orai qolaisyz eldi mekenderde asa qaýipti juqpaly aýrýǵa qarsy profilaktikalyq sharalar belsendi júrip jatyr.
