Qyzylorda oblysynda iz-tússiz joǵalǵan azamattyń máiiti tabyldy, dep habarlaidy QazAqparat.
Oblystyq politsiia departamentiniń baspasóz qyzmeti málim etkendei, 12 qyrkúiekte S.Begimbai óz basqarýyndaǵy jeńil avtokóligimen Nur-Sultan qalasyna jolǵa shyǵyp, habar-osharsyz ketken.
Osyǵan bailanysty Qylmystyq kodekstiń 99-babynyń 1-bóligimen qylmystyq is tirkelip, sotqa deiingi tergep-tekserý áreketteri bastalǵan.
Qylmystyq istiń tóńireginde S.Begimbaidy tabý úshin keshendi jedel izdestirý is-sharalary uiymdastyrylyp, oǵan jedel ýákilder men ýchaskelik politsiia inspektorlary arasynda qurylǵan birneshe mobildi toptar, tótenshe jaǵdailar departamentiniń qyzmetkerleri, Ulttyq ulan sarbazdary jáne týǵan-týysqandary, joldastary, eriktiler jumyldyrylǵan.
Keshendi izdestirý sharalaryna arnaiy tehnika men tikushaq qoldanylǵan.
Nátijesinde 19 qazanda «Qyzylorda-Jezqazǵan» tasjolynyń 128-shaqyrymynan S.Begimbaidyń jeńil avtokóligi jáne jeke zattary tabylyp, aiǵaqty zat retinde alynǵan.
Al 22 qazan saǵat 13:25 shamasynda «Qyzylorda-Jezqazǵan» tasjolynyń 128 shaqyrymynan batysqa qarai 30-40 shaqyrym qashyqtyqtaǵy dalalyq jerden belgisiz azamattyń máiiti tabyldy.
Tergeý organy belgisiz azamattyń máiiti S.Begimbaiǵa tiesili bolýy múmkin dep boljam jasady.
«Qazirgi ýaqytta oqiǵa bolǵan jerde jedel tergeý toby jáne tótenshe jaǵdai departamentiniń qyzmetkerlerimen tekserý júrgizip jatyr. Osy rette máiitti taný jáne tiisti sot-saraptamasynyń nátijesinde belgisiz azamattyń máiiti naqty kimge tiesili ekeni anyqtalady» dep málim etti politsiia.
