Qyzylordada qutqarýshylar ájethanadan ómirge kelgenine kóp bola qoimaǵan shaqalaqtyń óli denesin alyp shyqty, dep habarlaidy "Ult aqparat".
Oqiǵa 1 jeltoqsanda oblys ortalyǵyndaǵy «Aqmarjan» shaǵyn aýdanynda boldy. Shaqalaqty 1997 jylǵy azamatsha dúniege alyp kelgeni anyqtaldy.
«Bul jóninde politsiia bóliminen tótenshe jaǵdailar departamentine habar kelip tústi. Oqiǵa ornyna departamenttiń jedel qutqarý jasaǵynan 1 tehnika men 6 qutqarýshy bardy. Qutqarýshylar shaqalaqtyń óli denesin shyǵaryp, ony politseilerge tapsyrdy», - dedi Qyzylorda oblystyq tótenshe jaǵdailar departamenti bastyǵynyń mindetin atqarýshy Rýslan Qairaqbaev.
Málim bolǵanyndai, qazir áiel oblystyq meditsina ortalyǵyna jatqyzylǵan. Oqiǵanyń mán-jaiy anyqtalýda.
Oblystyq politsiia departamenti tergeý basqarmasynyń bastyǵy Ábdibek Janazarovtyń aitýynsha, atalǵan oqiǵa boiynsha QR Qylmystyq kodeksiniń 100-babymen qylmystyq is qozǵaldy. Onda jańa týǵan balany anasynyń óltirýi kórsetilgen.
