Qyzylordada 200 mln teńgeden astam kólemde salyqtan jaltarǵan kásipkerge sot úkimi shyqty, dep habarlaidy "Ult aqparat".
Qyzylorda oblysy boiynsha Ekonomikalyq tergep-tekserý departamenti 10 jyldan astam «turǵyn úilerge qurylys jumystaryn kórsetý» baǵytynda jumys jasaǵan seriktestiktiń salyqqa bailanysty zańsyzdyqqa jol bergenin anyqtady. Seriktestik direktory deklaratsiiany tabys etpeý nemese salyq salynatyn basqa da nysandardy jasyrý jolymen biýdjetke tólenetin mindetti tólemderden jaltarǵan. Onyń kólemi 200 mln 256 myń teńgeni qurady.
Aita keterligi, sottalýshy 2017-2018 jyldary 5 zańdy tulǵadan belgili kólemde syiaqy berý arqyly is júzinde oryndalmaǵan jumystar, kórsetilmegen qyzmetter jáne tiep-jóneltilmegen taýarlar úshin jalǵan shot-faktýra, oryndalǵan jumys aktilerin, qolma-qol esep aiyrysqandyǵy jóninde kvitantsiia qujattaryn satyp alǵan.
«Qyzylorda qalasynyń №2 soty ony QR Qylmystyq kodeksiniń 245-baby 3-bóligimen kináli dep tanydy. Onda uiymdarǵa salynatyn salyqty jáne biýdjetke tólenetin basqa da mindetti tólemderdi tóleýden jaltarý jaǵdaiy kórsetilgen. Sot oǵan kásiptik nemese kommertsiialyq uiymdarda basshylyq qyzmetin atqarý quqyǵynan úsh jyl merzimge aiyrý, shartty túrde bes jyl merzimge bas bostandyǵynan aiyrý týraly úkim shyǵardy. Jáne osy merzimge probatsiialyq baqylaý taǵaiyndaldy. Jaýapker jaltarǵan salyq somasyn óndirýge mindetteldi», - dep málim etti Qyzylorda oblysy boiynsha Ekonomikalyq tergep-tekserý departamentinen.
