Qyzylordada 17 aqbókendi atqan oblys ortalyǵynyń turǵyny qolǵa tústi, dep habarlaidy QazAqparat.
Qyzylorda oblysynyń tabiǵi resýrstar jáne tabiǵat paidalanýdy retteý basqarmasyna qarasty «Qyzylorda oblystyq janýarlar dúniesin memlekettik qorǵaý jónindegi mamandandyrylǵan mekemesiniń» mamandary «Ohotzooprom ÓB» RMKQ qyzmetkerlerimen birlesip reid júrgizgen edi.
«Kezekti is-shara barysynda Jalaǵash aýdanyna qarasty Jyryq atty skvajina mańynda «Taiota land krýzer-100» avtokóligi kúdik týdyrdy. Belgisiz tulǵa oqiǵa ornynan izin sýytýǵa árekettendi.
Kóp uzamai Jalaǵash aýdanyna qarasty Qyzylshyn dep atalatyn jerde onyń kóligi órtengendigi baiqaldy. Sol jerden barlyǵy 17 bas aqbókenniń óli denesi jáne 54 dana múiizi tabyldy. Ol aiǵaq zat retinde alyndy. Jalaǵash aýdandyq politsiia bólimimen birlesip, sol mańdy qaraý barysynda Shaqshaq dep atalatyn mal aýylynan kúdik keltirilgen Qyzylorda qalasynyń turǵyny anyqtaldy», - dep málim etti Qyzylorda oblystyq tabiǵi resýrstar jáne tabiǵat paidalanýdy retteý basqarmasynan.
Vedomstvo málimetinshe, oqiǵa boiynsha mán-jaidy qarap, shara qoldaný úshin qujattar men aiǵaq zattar Jalaǵash aýdandyq politsiia bólimine ótkizildi.
