Tokio Olimpiadasynda bokstan qola júldeger atanǵan Qamshybek Qońqabaevqa jerlesteri jańa kóliktiń kiltin tabys etti, dep habarlaidy "Ult aqparat".
Búgin oblys ákimi Gúlshara Ábdiqalyqova Tokio Olimpiadasyna qatysqan qyzylordalyq sportshylar Qamshybek Qońqabaev, Dáýlet Niiazbekov jáne Móldir Jańbyrbaimen júzdesti. Aimaq basshysy qola júldeger Qamshybek Qońqabaevty jáne dúbirli dodada el namysyn abyroimen qorǵaǵan Dáýlet Niiazbekov jáne Móldir Jańbyrbaiǵa alǵysyn bildirdi. Sportshylardyń jeńisi El Táýelsizdigine úlken tartý bolǵanyn atap ótti.
«Eki apta boiy ózderińe jankúier boldyq. Qamshybektiń altynǵa bergisiz qola júldesi eldiń kóńilin kóterdi. Talai búldirshinniń qiialyna qanat bitirdi. El Prezidentinen Memlekettik Týdy alý -qashanda úlken mártebe, zor senim! Bul mindetti jerlesimiz Qamshybek Qońqabaev abyroimen aqtap, bairaǵymyzdy Olimpiada tórinde jelbiretti», - dedi oblys ákimi.
Biyl Syr sportshylary tolaiym tabystarǵa qol jetkizýde. Jyl basynan jerlesterimiz el birinshilikterinde 700 medal jeńip alsa, Álem, Aziia chempionattarynda 46 medalǵa qol jetkizdi.
Kezdesýde oblys ákimi Gúlshara Ábdiqalyqova el namysyn abyroimen qorǵap shyqqan Qamshybek Qońqabaevqa «Toyota Camry 75» avtokóliginiń kiltin tabys etti.
Al Olimpiada oiyndarynyń qatysýshylary Dáýlet Niiazbekov, Móldir Jańbyrbaiǵa jáne Qamshybek Qońqabaevtyń bapkeri Seiitjan Tókenovke 1 mln teńgeniń sertifikaty berildi. Eldiń rýhy men mártebesin kótergen sportshylarǵa «Dalatex» JShS-niń basshysy Dimash Ábishev, «Nurlen» JShS-niń basshysy Qairat Boranbaev, «Meliorator» JShS-niń basshysy Berdibek Myhanov jáne «Standart Oil KZO» JShS-niń basshysy Ádil Bijanov demeýshilik kórsetti.
Sondai-aq, jiynda aýyr atletikadan 4 dúrkin álem chempiony, QR eńbek sińirgen sport sheberi Ilia Ilin Qamshybekti jeńisimen quttyqtady. Al Móldir men Dáýletke aldaǵy saiystarda sáttilik tiledi.
Eske salsaq, dúbirli dodaǵa Qazaqstan atynan 97 sportshy sporttyń 28 túrinen baq synady.
Qazaqstan sportshylary segiz qola medal aldy. Olardyń qatarynda dziýdoshy Eldos Smetov, aýyr atletter Igor Son men Zýlfiia Chinshanlo, boksshylar Qamshybek Qońqabaev, Sáken Bibosynov, palýan Nurislam Sanaev pen karateshi Darhan Asadilov pen Sofia Berýltseva bar.
