Qyzylorda oblysynda qylmystyq atqarý júiesiniń qyzmetkerleri bir aptaǵa jýyq ýaqyttyń ishinde 190-nan astam tyiym salynǵan zatty tárkilegen, dep habarlaidy "Ult aqparat".
Túrmege tyiym salynǵan «tapsyrystardy» jetkizý úshin zańbuzýshylar túrli tásilder qoldanǵan.
Mysaly, abaqty aýmaǵynda qum blogyn soǵýmen ainalysatyn jaýapkershiligi shekteýli seriktestikke tsement ákelgen «KamAZ» júk kóligin tekserý kezinde 190 tyiym salynǵan zat tárkilengen.
«Oqiǵa 9 shildede boldy. Keshki saǵat altylar shamasynda Qyzylorda oblysy boiynsha qylmystyq atqarý júiesi departamentiniń ZK-169/5 mekemesiniń aldyna tsement tielgen kólik kelip toqtaǵan. 44 jastaǵy «KamAZ» júrgizýshisi koloniia aýmaǵynda ornalasqan kásiporynǵa 196 qap qurylys qospasyn ákele jatqanyn aitqan. Tekserý barysynda jedel bólim qyzmetkerleri 7 qaptan 190-nan astam tyiym salynǵan zat taýyp, tárkiledi. Atap aitsaq, 63 shprits, shamamen 0,5 keli esirtki, 43 uialy telefon, 14 jup qulaqqap, 13 SIM-karta, 35 qaýattaǵysh qurylǵy, 1 shaǵyn kamera, 10 qorap oiyn kartasy, jarty litrlik qutylarǵa salynǵan 12 «nasybai» bótelkesi jáne 3 litr spirt shyqty», - dep jazady oblystyq qylmystyq atqarý júiesi departamentiniń baspasóz qyzmeti.
«Tapsyrysty» oryndaýshylar uialy telefondar men esirtkiniń senimdi jerde saqtalýyna qatty kóńil bólgen kórinedi.
Tsement toly qaptardy jaryp qaraý arqyly ǵana anyqtaý múmkin bolǵan.
Atalǵan fakti boiynsha qalalyq politsiia basqarmasynyń jedel-tergeý toby sotqa deiingi tergeý bastady.
Al abaqty aýmaǵynda qum blogyn shyǵaratyn seriktestikpen jasalǵan kelisimsharttyń kúshi joiyldy.
Atalǵan kásiporyn bul mekeme aýmaǵynda 2017 jyldan beri jumys istep kelgen.
Al 14 shildede ZK-169/1 mekemesiniń sottalýyshlaryna joldanǵan azyq-túlikti tekserý kezinde maionez qorabynan SIM-kartasy bar uialy telefon tárkilengen.
«Tergeý barysynda tapsyrys iesi osyndaǵy urlyq jasaǵany úshin sottalǵan adam ekeni belgili boldy. Endi onyń syrtttaǵylarmen bailanysy shekteledi. Al tapsyrysty jetkizýshi Ákimshilik quqyq buzý týraly kodekstiń 481-baby boiynsha jaýapqa tartyldy», - deidi Qyzylorda oblysy boiynsha QAJD bastyǵy Shaimerden Eskenkeldiev.
Onyń aitýynsha, Qyzylorda oblysynda QAJ aýmaqtyq departamentine qarasty 3 mekeme bar.
Ol sondai-aq, qurylys materialy arqyly esirtki kirgizý siiaqty qylmystyq áreketter oblys aýmaǵynda birinshi ret tirkelip otyrǵanyn, budan bylai abaqty aýmaǵyndaǵy jumys berýshilerdiń qyzmetine qatań baqylaý ornatylatynyn aitty.
