Syr óńirinde agroónerkásip kesheni salasynda "aqyldy tehnologiialardy" engizý maqsatynda avtomattandyrylǵan jylyjai salynyp, "elektrondy veterinariia" jobasy iske qosyldy jáne Agrobirja jobasy júzege asyrylýda. Bul týraly búgin Astana qalasynda Ortalyq kommýnikatsiialar qyzmetinde ótken baspasóz máslihatynda Qyzylorda oblysynyń ákimi Qyrymbek Kósherbaev málimdedi, dep habarlaidy "Ult aqparat".
"Elektrondy veterinariia" jobasy aiasynda "Mobi-VET" mobildi qosymshasy ázirlendi. Onyń negizgi maqsaty - fermerlik sharýashylyqtar men halyqtyń josparly veterinariialyq is-sharalardy oryndaýy boiynsha tolyq aqparat alý.
Sonymen qatar, "jobalyq basqarý" aiasynda aimaqta elektrondy saýda alańyn – Agrobirjany qurý jobasy júzege asyrylýda. Bul ónimdi tiimdi ótkizýge kómektesedi jáne de negizgi tirek syrtqy naryqtarǵa jasalady.
"Shikizatty qaita óńdeýdi qamtamasyz etý jáne syrtqy naryqqa sapasy jaǵynan ǵana emes, baǵasy jaǵynan da básekege qabiletti joǵary sapaly daiyn ónimmen shyǵý mindetin qoiyp otyrmyz. Memleket basshysy atap ótkendei, bul tusta "aqyldy tehnologiialardy" engizý arqyly jaqsy nátijege qol jetkize alamyz. Birinshi kezeńde biz maldardy baqylaýǵa arnalǵan navigatorlardy iske qostyq, "elektrondy veterinariia" jobasy men avtomattandyrylǵan jylyjai qurylysyn júzege asyra bastady", - dedi aimaq basshysy.
Bul rette kúrish sharýashylyǵy óńirdiń agroónerkásiptik kesheninde jetekshi sala bolyp qala beredi.
"Biylǵy sý tapshylyǵy men aýa raiynyń qolaisyzdyǵyna qaramastan 473 myń tonna (54,5 ts/ga) kúrish ónimin jinadyq. Jáne aǵymdaǵy jyly sýdyń jetispeýine bailanysty 600 myń ga kúrish egistigin joǵalttyq. Sondyqtan da, osyndai jaǵdailardy boldyrmaý úshin qazir óńirde sý tasqyny kezeńinde 2mlrd.m3-tan astam sý jinaityn "Kúmisketken" jáne "Qaraózek" sý qoimalaryn salý máselesin qarastyrýdamyz", - dep atap ótti oblys ákimi.
Qyzylordalyq agrarlar Monǵoliia, Túrkiia, Aýǵanstan naryqtaryn igerýde. Dástúrli ónimderinen bólek Iranǵa eksporttaý úshin Iran sorttaryn da shyǵarý qolǵa alynǵan.
2016 jyly baqsha daqyldarynyń eksporty qaita jańǵyrtylsa, 2017 jyly Arab Ámirlikterine, Iran, Monǵoliia jáne Ózbekstanǵa kókónis pen mal eksporty bastaldy, al, aǵymdaǵy jyly Qytaiǵa alǵash ret maqsary maiyn jiberdi. Qabyldanǵan sharalar sońǵy jylda aýylsharýashylyǵy ónimderiniń eksport kólemin 28%-ǵa arttyrýǵa múmkindik berdi .
Kúrish, tuz jáne balyq-óńir eksporttai alatyn jalǵyz taýarlar emes. Oblys úlken eksporttyq áleýetke ie jáne sala eksportqa baǵdarlanǵan (óńirlik ekonomikanyń draiveri) bolýy múmkin. AÓK salasyn damytý biz úshin óńirlik ekonomikaǵa úles retinde ǵana emes, sondai-aq, osy salada aýyl halqynyń basym bóligin jumyspen qamtý turǵysynan da mańyzdy bolyp tabylady.
Aita ketý kerek, birneshe jyl ishinde oblystyń JIÓ-degi aýylsharýashylyǵynyń úlesi 2,5%-dan 3,7%-ǵa deiin artty. Bul ekonomika qurylymyndaǵy ózgeristerdiń sapalylyǵyn ańǵartady.
