Qyzylorda oblysynda jol apatynan 8 adam kóz jumdy, dep habarlaidy QazAqparat.
Oqiǵa búgin, 15 qańtarda 13.30 shamasynda Aral aýdanyna qarasty Aralqum eldi mekeniniń tusynda «Shymkent-Samara» tas jolynyń boiynda boldy.
Jol-kólik oqiǵasynan 8 adam kóz jumdy.
Apatqa bailanysty QR Qylmystyq kodeksiniń 345-babynyń 4-bóligimen sotqa deiingi tergep-tekserý áreketteri júrgizilýde. Onda avtomobildi basqaratyn adamnyń jol júrisi qaǵidalaryn buzyp, abaisyzda eki nemese odan da kóp adamnyń ólimine ákep soǵý jaǵdaiy kórsetilgen. Tiisti sot saraptamalary taǵaiyndaldy. Qazirgi ýaqytta oqiǵanyń mán-jailary anyqtalýda.
«Óńirde aýa raiynyń qolaisyzdyǵyna bailanysty Qyzylorda oblysynyń komendatýrasy júrgizýshilerdi jyldamdyq mólsherin arttyrmai, jolda júrý erejesin saqtaýlaryn suraidy. Qajetti ara qashyqtyqty ustap, qaýipsizdikti qamtamasyz etip, jol erejesin qatań túrde ustaný qajettigin eskertedi», - dep málim etti Qyzylorda oblystyq politsiia departamentinen.
Qyzylorda oblysy TJD Órt sóndirý jáne avariialyq qutqarý jumystary qyzmeti málimetine súiensek, 112 qutqarý qyzmetine túsken habarlama boiynsha №3 mamandandyrylǵan órt sóndirý bóliminen 2 arnaiy tehnika jáne 8 qyzmetker oqiǵa ornyna jetken.
«Oqiǵa ornynda Vengriiadan Ózbekstan astanasy Tashkent qalasyna dári-dármek tasymaldap kele jatqan «Volvo» markaly júk kóligine Qazalydan Aralǵa bara jatqan «Mazda MPV» markaly avtokóligimen qarsy baǵytqa shyǵyp ketken «Mazda MPV» avtokóligi soqtyǵysqan. Júk kóligin 1977 jylǵy vengriialyq azamat basqarsa, avtokólik tizgininde 1991 jylǵy qazaqstandyq azamat bolǵan. Jol-kólik oqiǵasynan avtokólik ishinde qysylyp qaza bolǵan marqumdardyń denesi arnaiy quraldarmen syrtqa shyǵaryldy», - dep málim etti TJD Órt sóndirý jáne avariialyq qutqarý jumystary qyzmeti.
