Qazir qurylys alańynda 662 adam jumys isteýde, jalpy qurylys jumystarynyń 90%-y aiaqtalǵan. Óndiris orny 2018 jyldyń jeltoqsanynda paidalanýǵa beriledi dep josparlanyp otyr.
Oblys ákimi Q.Kósherbaev Shieli aýdanyna jumys sapary barysynda zaýyttyń qurylys jumystarymen tanysyp, Qytai Halyq Respýblikasynan bilim alyp kelgen 17 jas mamanmen kezdesti.
Qazirgi tańda, tsement óndiretin zaýyttyń qurylys-montaj jumystary 90 paiyzǵa aiaqtalǵan, óndiris ornynyń bolashaq qyzmetkerleri Qytaida bilim alýda.
Esterińizge salaiyq, jergilikti turǵyndardy jumysqa tartý úshin «Gejýba Shieli Tsement" kompaniiasy aýdandaǵy indýstrialdy kolledjdiń túlekterin – 46 adamdy bilim alýǵa ári zaýytta jumys isteýge daiarlyqtan ótýge jibergen bolatyn. Aimaq basshysy oqýyn támamdap kelgen alǵashqy 17 túlekpen kezdesti. Qazirgi tańda ekinshi toppen oqityn 80 stýdent iriktelip alyndy.
Memlekettik-jekemenshik áriptestik sheńberinde zaýytqa elektr jelisimen jabdyqtaý jáne temir jol salý jumystary júrgizilýde. Sondai-aq oblystyq biýdjetten ónerkásiptik aimaqqa gaz qubyryn salý úshin qarajat bólindi.
Esterińizge salaiyq, Shielidegi tsement óndiretin zaýyttyń jobalyq qýaty jylyna 1 mln. tonnany quraidy. Joba aiasynda 50 gektar jer telimi bólindi, onyń 46 gektary naqty zaýyt qurylysy úshin, al tórt gektarynda qyzmetkerlerge arnalǵan áleýmettik nysandardyń qurylysy júrgizilýde. Kásiporyn ónimderi Eýraziialyq ekonomikalyq odaq, TMD jáne QHR elderine jetkiziletin bolady. Jobany iske asyrý úshin «DANAKE Korporatsiiasy» JShS jáne qytailyq kompaniia «Gezhouba Group Cement Co. Ltd» aiasynda «Kompaniia Gejýba Shieli Tsement» JShS birlesken kásiporny quryldy.
Zaýyt tolyq iske qosylǵan kezde ónerkásipte 220 turaqty jumys orny qurylady.
