Qyzylordada karantin talaptaryn saqtamai toi ótkizgen 140 adamǵa aiyppul salyndy, dep habarlaidy "Ult aqparat".
Oblysta qoiylǵan shekteýler men karantin sharalarynyń saqtalýyn baqylaý úshin 24 monitoring toby qurylǵan. Top músheleri búgingi kúnge deiin 140-qa jýyq toi ótkizgen adamdy anyqtady. Olarǵa qomaqty mólsherde aiyppul salyndy. Óńirde keibir kafeler shekti ýaqytqa qaramai, jumysyn jalǵastyrǵan.
Jumysshy top tarapynan 2486 reid júrgizildi. Oblys boiynsha jeke adamdar jáne biznes sýbektileri tarapynan 602 karantin talabyn buzý deregi tirkeldi. Nátijesinde ákimshilik hattamalar toltyrylyp, 30 millionǵa jýyq aiyppul salyndy.
«Qazirgi kezeńde tiisti qaýly talaptaryn qatań saqtaý qajet. Qazaqta «Aýyryp em izdegenshe, aýyrmaýdyń jolyn izde» degen sóz bar. Ár adamnyń densaýlyǵy myqty bolýy óz qolynda. Sondyqtan saqtyq sharalaryna asa mán bereiik», - dedi oblystyq Taýarlar, qyzmetterdiń sapasy men qaýipsizdigin baqylaý departamenti basshysynyń orynbasary, oblys boiynsha bas memlekettik sanitariialyq dárigeri Áliia Ábdiqaiymova.
Sondai-aq, oblysta koronavirýs infektsiiasynyń boljamdy ekinshi tolqynyna daiyndyq kúsheitildi. Óńirde búginde 350 million teńgeniń dári-dármek qory jasaldy.
«Dári-dármektiń dárihanalarda - 45, emhanalarda - 1 aiǵa jetetin qory bar. Epidahýaldyń turaqtalýyna orai infektsiialyq, provizorlyq, karantindik tósek oryndary 10 esege deiin qysqardy. Jaǵdai kúrdelene tússe, 3 myń tósek orynǵa laiyqtalǵan 21 aýrýhana daiyn. Sondai-aq, úi jaǵdaiynda em alatyndar úshin 161 mobildi top quryldy», - dedi Á. Ábdiqaiymova.
Indetke qarsy kúreske tartylatyn meditsina salasynyń 3,5 myń mamanyna 2 aiǵa jetetin qorǵanysh quraly alynǵan. Ókpeni jeldetetin apparat sany 191-ge jetkizildi.
