Qyzylorda oblysynda taǵy bir sý qoimasy salynady, dep habarlaidy "Ult aqparat".
Bul týraly QR Ekologiia, geologiia jáne tabiǵi resýrstar ministrliginiń Facebook paraqshasynda ótken tikelei efirdegi «Qazsýshar» RMK Qyzylorda filialynyń direktory Hamit Biimbetov málimdedi.
«Qaraózek aýylynda taǵy bir jańa sý qoimasy salynady. Jobalyq smetalyq qujat biyl saraptamaǵa beriledi. Keler jyly qarjy máselesi sheshilýi tiis», - dep atap ótti Hamit Biimbetov.
Ol Qyzylorda sý torabyndaǵy jóndeý jumystary týraly da aitty.
«Qyzylorda sý torabyn jóndeýge 2020 jylǵa 481 mln teńge, 2021 jylǵa 1 mlrd 420 myń teńge, 2022 jylǵa 709 mln teńge qarastyrylǵan. Sol jaq magistral kanalynda beton jumystary júrgizilýde. 2022 jyly barlyq jumys bitýi tiis. Atalǵan sý toraby 1956 jyly paidalanýǵa berilse, buǵan deiin keshendi jóndeýden ótpegen edi. Budan bólek Aitek, Jideli sý qoimalary jóndelýde. Olardyń jumysy 2020 jyldyń sońyna deiin aiaqtalady. Jideli jeltoqsannyń basynda iske qosylady», - dedi filial basshysy.
Hamit Biimbetov biylǵy vegetatsiialyq kezeńniń qalai ótkenine de toqtaldy.
«Biyl vegetatsiialyq kezeń basynda Kóksarai kontrregýliatoryna 3 mlrd-tyń ornyna 2 mlrd tekshe metr sý jinalyp, 1 mlrd tekshe metr jetpei dihandar azdap qinaldy. Biraq ákimdik kúrish egý mekemelerimen birge 300 km ishki kanaldardy tazalady. Biz 61 km magistraldi kanaldardy tazaladyq. 90 myń gektar kúrish egilse, sonyń bárine kezekpen bekitilgen keste boiynsha úlestire otyryp, sý jetkize aldyq», - dedi ol.
