Qyzylorda oblysynda kúrish alqabynyń 80-85 myń gektaryn saqtap qalyp, qalǵanyn basqa daqyldar úshin paidalaný kerek. Bul týraly Qyzylorda oblysynyń ákimi Gúlshara Ábdiqalyqova «Apta» baǵdarlamasyna bergen suhbatynda aitty, dep habarlaidy "Ult aqparat".
«Qyrǵyzstandaǵy Toqtoǵul sý qoimasynda byltyr 18 mlrd. tekshe metr sý bolsa, biyl 12 mlrd. tekshe metr ǵana sý boldy. Sol siiaqty Ózbekstannan keletin sý bizdiń Shardarada sý qoimasynyń mólsheri byltyrǵymen salystyrǵanda 1,1 mlrd. tekshe metrge az bolǵan. Jazǵy ýaqytta egis egilgen soń qiyndyqtar boldy, sol sebepti egistikti sýǵarýdy qol rejiminde basqarýǵa týra keldi. Ekologiia jáne tabiǵatty qorǵaý ministrligine kóp rahmet aitamyz. Kúnde tańerteń jumysty solarmen bastap, sýdy rettep otyrýǵa týra keldi. Bizdiń kásipkerler men eginshilerimizge de rahmet aitqym keledi. Olarǵa sýdy kezek-kezek berip otyrdyq. Mysaly, kúnde sekýndyna eń keminde 550 tekshe metr sý kelýi kerek bolsa, ol 450 tekshe metrge deiin túsip ketken kezderi boldy», - deidi Qyzylorda oblysynyń ákimi Gúlshara Ábdiqalyqova.
Onyń aitýynsha, biyl óńirde egis jaqsy shyqqan. Atap aitqanda, biyl 551 myń tonna kúrish jinaldy. Bul byltyrmen salystyrǵanda 15 myń tonnaǵa kóp.
«Egiste de ártaraptandyrý máselesi bar. Mysaly, kúrishtiń 1 gektaryna 33 myń tekshe metr sý qajet, al týra osyndai kólemdegi sýdy 10 myń gektarǵa egilgen qyzanaqqa da jumsaýǵa bolady. Kúrishtiń 1 gektarynan 650 myń teńge kiris bolsa, qyzanaqtyń 1 gektarynan 25 million teńgege deiin kiris alýǵa bolady. Bul kórsetkishti jońyshqamen de, basqa da daqyldarmen salystyrýǵa bolady. Sondyqtan biz kásipkerler, eginshilermen birge oilanyp, kúrish alqabynyń 80-85 myń gektaryn saqtap, qalǵanyn basqa daqyldar úshin paidalaný kerek dep túidik», - deidi ol.
