قىزىلوردا وبلىسىندا كٷرٸش القابىنىڭ 80-85 مىڭ گەكتارىن ساقتاپ قالىپ, قالعانىن باسقا داقىلدار ٷشٸن پايدالانۋ كەرەك. بۇل تۋرالى قىزىلوردا وبلىسىنىڭ ەكٸمٸ گٷلشارا ەبدٸقالىقوۆا «Apta» باعدارلاماسىنا بەرگەن سۇحباتىندا ايتتى, دەپ حابارلايدى "ۇلت اقپارات".
«قىرعىزستانداعى توقتوعۇل سۋ قويماسىندا بىلتىر 18 ملرد. تەكشە مەتر سۋ بولسا, بيىل 12 ملرد. تەكشە مەتر عانا سۋ بولدى. سول سيياقتى ٶزبەكستاننان كەلەتٸن سۋ بٸزدٸڭ شاردارادا سۋ قويماسىنىڭ مٶلشەرٸ بىلتىرعىمەن سالىستىرعاندا 1,1 ملرد. تەكشە مەترگە از بولعان. جازعى ۋاقىتتا ەگٸس ەگٸلگەن سوڭ قيىندىقتار بولدى, سول سەبەپتٸ ەگٸستٸكتٸ سۋعارۋدى قول رەجيمٸندە باسقارۋعا تۋرا كەلدٸ. ەكولوگييا جەنە تابيعاتتى قورعاۋ مينيسترلٸگٸنە كٶپ راحمەت ايتامىز. كٷندە تاڭەرتەڭ جۇمىستى سولارمەن باستاپ, سۋدى رەتتەپ وتىرۋعا تۋرا كەلدٸ. بٸزدٸڭ كەسٸپكەرلەر مەن ەگٸنشٸلەرٸمٸزگە دە راحمەت ايتقىم كەلەدٸ. ولارعا سۋدى كەزەك-كەزەك بەرٸپ وتىردىق. مىسالى, كٷندە سەكۋندىنا ەڭ كەمٸندە 550 تەكشە مەتر سۋ كەلۋٸ كەرەك بولسا, ول 450 تەكشە مەترگە دەيٸن تٷسٸپ كەتكەن كەزدەرٸ بولدى», - دەيدٸ قىزىلوردا وبلىسىنىڭ ەكٸمٸ گٷلشارا ەبدٸقالىقوۆا.
ونىڭ ايتۋىنشا, بيىل ٶڭٸردە ەگٸس جاقسى شىققان. اتاپ ايتقاندا, بيىل 551 مىڭ توننا كٷرٸش جينالدى. بۇل بىلتىرمەن سالىستىرعاندا 15 مىڭ تونناعا كٶپ.
«ەگٸستە دە ەرتاراپتاندىرۋ مەسەلەسٸ بار. مىسالى, كٷرٸشتٸڭ 1 گەكتارىنا 33 مىڭ تەكشە مەتر سۋ قاجەت, ال تۋرا وسىنداي كٶلەمدەگٸ سۋدى 10 مىڭ گەكتارعا ەگٸلگەن قىزاناققا دا جۇمساۋعا بولادى. كٷرٸشتٸڭ 1 گەكتارىنان 650 مىڭ تەڭگە كٸرٸس بولسا, قىزاناقتىڭ 1 گەكتارىنان 25 ميلليون تەڭگەگە دەيٸن كٸرٸس الۋعا بولادى. بۇل كٶرسەتكٸشتٸ جوڭىشقامەن دە, باسقا دا داقىلدارمەن سالىستىرۋعا بولادى. سوندىقتان بٸز كەسٸپكەرلەر, ەگٸنشٸلەرمەن بٸرگە ويلانىپ, كٷرٸش القابىنىڭ 80-85 مىڭ گەكتارىن ساقتاپ, قالعانىن باسقا داقىلدار ٷشٸن پايدالانۋ كەرەك دەپ تٷيدٸك», - دەيدٸ ول.
