Aǵymdaǵy jyldyń 1 qazany boiynsha, qoldanystaǵy shaǵyn jáne orta biznes sýbektileriniń sany 41 393-ti qurady. Sońǵy jyly olardyń sany 11 paiyzdan asqan edi. Bul ShOB ósý qarqyny boiynsha respýblikadaǵy óńirler arasynda eń jaqsy nátije bolyp tabylady.
16-17 qazanda Qyzylorda oblysy ákimdiginde jappai kásipkerlikti damytý boiynsha májilis ótip, onda 9 aida atqarylǵan jumystar qorytyndylandy.
Esterińizge sala keteiik, jańa jumys oryndaryn ashý, 2018-2020 jyldardaǵy óńirlik ónimdegi shaǵyn jáne orta kásipkerlik sýbektileriniń úlesin arttyrý jáne jumyssyzdar men ózin-ózi nátijesiz jumyspen qamtyǵandardyń sanyn azaitý maqsatynda aimaqta jappai kásipkerlikti damytý men qoldaýdyń úsh jyldyǵy jariialandy.
Jinalysqa aýyldyq okrýg pen aýdan ákimderi, kýratorlar - aýyldyq jerlerdegi kásipkerlikti damytýǵa jaýapty aimaqtyq departamentter men inspektsiialardyń, basqarma men óńirlik qarjy institýttarynyń basshylary qatysty.
«Jyldyń basynda jumyssyzdar men ózin-ózi nátijesiz jumyspen qamtyǵandar sany 97,5 myń bolsa, búgingi kúni olardyń sany 35,8 myń adamdy quraidy. Iaǵni 62 myńǵa jýyq adam jumyspen qamtylǵan jáne resmi túrde tirkelgen. Onyń ishinde 14 myńnan astam adam jappai kásipkerlikti qoldaý sharalary aiasynda jumys isteýde», - dedi aimaq basshysy.
Sondai-aq, 2017 jyldyń qorytyndysy boiynsha oblystyń ishki óńirlik ónimindegi shaǵyn jáne orta biznestiń úlesi 14,2 paiyzdy quraitynyn atap ótti.
«2018 jyldyń sońynda shaǵyn jáne orta biznes sýbektileriniń úlesi keminde 15 paiyzdy, 2020 jyly 25 paiyzdy quraýy kerek. Memleket basshysynyń bastamasy boiynsha, «Biznestiń jol kartasy-2020» baǵdarlamasy taǵy 5 jylǵa uzartyldy. Osyǵan orai, aýyldyq okrýgterdegi kásipkerlikti damytýǵa jaýapty tulǵalarǵa aýyl ákimderimen birlesip, naqty jobalar aiasynda, onyń ishinde zákirli jobalardy qoldaýdy jáne olar iske qosylǵansha baqylaý jasaýdy tapsyramyn», – dedi aimaq basshysy.
Aýdan, aýyldyq okrýg ákimderi men kýratorlar kásipkerlik sýbektilerin ashý boiynsha júrgizilgen jumystar jaily esep berdi. Mysaly, jyl basynan bastap 1 qazan aralyǵynda Syrdariia aýdanynda - 2167, Qyzylordada 26099 shaǵyn jáne orta biznes sýbektisi tirkelgen. Aimaq basshysy qala basqa aýdandarǵa úlgi bolýy kerek ekenin naqtylap, jyl sońyna deiin memlekettik organdar basshylarynyń óz salasy boiynsha ShOB damytý boiynsha júrgizilgen jumystarynyń qorytyndysy tyńdalatynyn atap ótti.
Májiliste keibir aýyldyq okrýgterdiń ákimderi men olardyń kýratorlaryna sógis pen eskertý berildi, jyl sońyna deiin oń nátije bermegen jaǵdaida, jumystan bosatylatynyn eskertti.
«Memleket barlyq jaǵdailardy jasaýda: qarajat bólindi, baǵdarlamalar ázirlendi, sizderden tek osy jumystardy óńirimizde uiymdastyrýǵa degen niet qajet. Biz oblys turǵyndarynyń ál-aýqatyna jaýaptymyz, jaýapkershilikti alyp, nátijeli jumys isteýge tiispiz. Jyl sońynda árqaisylaryńyzdyń esepterińiz tyńdalyp, jergilikti kásipkerlikti damytýǵa qosqan úlesterińiz qarastyrylatyn bolady», - dedi Q. Kósherbaev.
Sonymen qatar, aimaq basshysy ekinshi deńgeidegi bankterdiń basshylaryna nesie portfelin ulǵaitýdy tapsyrdy.
«Eger bankterdiń filialdary jumys istemese, aimaqtaǵy ShOB-tiń damýyna úles qospasa, onda qyzmetin durys atqarmaityn jergilikti filial direktorlaryn jumystan bosatýǵa nemese filialdy múldem jabýǵa qatysty basshylarynan talap etýge týra keledi», - dedi oblys ákimi.
Kezdesýdi qorytyndylai kele, aimaq basshysy jergilikti kásipkerlikti damytýda árbiriniń jeke jaýapkershilik tanytý kerektigin eskertti.
Esterińizge sala keteiik, biylǵy jyly oblys ákimdiginiń, oblystyq máslihattyń, «Nur Otan» partiiasy Saiasi keńesiniń, oblystyq qoǵamdyq keńestiń jáne Qyzylorda oblysy kásipkerler palatasynyń birlesken sheshimimen 2018-2020 jyldar óńirde jappai kásipkerlikti damytýdyń úshjyldyǵy retinde jariialandy. Osy ýaqyt aralyǵynda aimaqta shaǵyn jáne orta biznesti damytýǵa basymdyq beriletin bolady. Jappai kásipkerlikti damytý oblysta úsh mańyzdy máseleniń sheshim tabýyna: salyq bazasyn ulǵaitýǵa, turǵyndardy jumyspen qamtýǵa jáne qoǵamdyq turaqtylyqty qamtamasyz etýge yqpal etedi. ShOB sýbektilerin qarjylandyrý úshin oblystyq biýdjetten 32 mlrd. teńgeden astam qarjy bólindi. Onyń ishinde startap jobalaryna 3 mlrd. teńgeden astam qarjy qarastyrylǵan. Bolashaq jáne óz isterin bastaǵan kásipkerler úshin barlyq qolaily jaǵdailardy jasaý maqsatynda Kásipkerler úii ashyldy. Munda oblystyq Kásipkerlik jáne týrizm basqarmasy, «Qyzylorda» Óńirlik investitsiialyq ortalyǵy, Kásipkerlerge qyzmet kórsetý ortalyǵy, «Jobalarǵa saraptama júrgizý ortalyǵy» JShS, Óńirlik kásipkerler palatasy, «Tsesnabank» AQ Qyzylorda filialy jáne ózge de mekemeler ornalastyrylǵan.
