24.kz
Qyzylorda oblysy Qarmaqshy aýdanynyń turǵyny Saltanat Uzaqbai salmaǵy 6,5 keli bolatyn náreste dúniege ákeldi. Bul – óńir boiynsha tirkelgen ortasha kórsetkishten eki esege jýyq artyq, dep habarlaidy Ult.kz 24.kz-ke silteme jasap.
Dárigerlerdiń aitýynsha, bosaný úderisi kúrdeli ótti. Nárestege alǵashqy kezeńde reanimatsiialyq kómek kórsetilip, qosymsha em taǵaiyndalǵan. Qazirgi ýaqytta balanyń jaǵdaiyn oblystyq kópsalaly aýrýhananyń perinataldyq bóliminiń mamandary baqylaýda ustap otyr. Ana men balanyń ómirine qaýip tónip turǵan joq. Sábige Qýanyshbek degen esim berildi.
"Bastapqyda meni patologiia bólimshesine jatqyzdy. Ýltradybystyq zertteý barysynda sábidiń iri ekeni anyqtaldy. Dárigerler kesar tiligin jasaý týraly sheshim qabyldady. Ota sátti ótti, jaǵdaiymyz jaqsy", – dedi Saltanat Uzaqbai.
Akýsherlik bólim meńgerýshisi Arman Eranova bolsa, balanyń ári qarai qarqyndy terapiia bóliminde em alatynyn aitty.
"Qazir ana men balanyń jaǵdaiy qanaǵattanarlyq. Buǵan deiin de salmaǵy alty jáne odan da kóp keli bolatyn sábiler dúniege kelgen jaǵdailar boldy. Bul – ata-ananyń tuqym qýalaýshylyǵy men fiziologiialyq erekshelikterine bailanysty", – dedi ol.
