Qazaly stantsiiasynda № 481 «Tashkent-Samara» poiyzy; Aral teńizi stantsiiasynda № 378 «Mańǵyshlaq-Almaty» poiyzy; Sekseýil stantsiiasynda № 618 «Qyzylorda-Astana» poiyzynyń qatynasy qaita ornatyldy.
Esterińizge salaiyq, 12 qarasha saǵat 23:40 shamasynda Qyzylorda oblysy boiynsha tótenshe jaǵdai departamentiniń kezekshi qyzmetkerinen Qazaly-Aral baǵytyndaǵy Aral aýdanyna qarasty "Qamystybas-Shómish" aýmaǵynyń 2426 shaqyrymynda PK-7 P-1273 júk poiyzynyń relsten shyqqandyǵy týraly shuǵyl habar túsken bolatyn.
Aita keteiik, qazirgi tańda apattyń sebebi anyqtalyp jatyr. Adam shyǵyny joq.
Oblystyq jumyldyrý daiyndyǵy basqarma basshysynyń orynbasary Erlan Bákirovtiń aitýynsha, relsti jóndeý-qalpyna keltirý jumystary júrgizilip, oqiǵa saldarynan toqtaǵan jolaýshy poiyzdar: Qazaly stantsiiasynda №481 «Tashkent-Samara» poiyzy; Aral teńizi stantsiiasynda № 378 «Mańǵyshlaq-Almaty» poiyzy; Sekseýil stantsiiasynda №618 «Qyzylorda-Astana» poiyzynyń qatynasy qaita ornatyldy.
«Jedel qabyldanǵan sharalardyń arqasynda jolaýshylar poiyzynyń qatynasy tez arada qalpyna keltirildi, atalmysh poiyzdardaǵy jolaýshylarǵa qajetti kómek kórsetildi. 2 toraptyń 1-eýi tazartylyp, ekinshisi boiynsha jóndeý jumystary júrgizilip jatyr»,- dep málimdedi Erlan Bákirov.
Túnde oryn alǵan oqiǵaǵa qatysty Qyzylorda oblysy ákimdigi tarapynan kelesidei sharalar qabyldandy: relsti jóndeý-qalpyna keltirý jumystary júrgizilip jatyr, Aral aýdany ákimi Muhtar Orazbaev oqiǵa ornynda bolyp, tiisti jumystardyń júrgizilýin qadaǵalady, Aral jáne Qazaly stantsiialarynda toqtaǵan jolaýshy poiyzdardyń qatynasyn qalpyna keltirý boiynsha jumystar júrgizildi. Atalmysh poiyzdaǵy jolaýshylarǵa qajetti kómek kórsetildi. Ol úshin jergilikti kásipkerler jumyldyryldy. Poiyz ishindegi aýa raiyn saqtaýǵa qajetti qatty otyn qory jasaqtaldy. Degenmen, órt sóndirý tehnikasy men jedel járdem kóligi arnaiy kezekshilikke qoiyldy. Sonymen qatar, jaqyn mańdaǵy eldimekenderdegi meditsinalyq beketter qajet bolǵan jaǵdaida adamdardy qabyldaýǵa daiyn turdy.
