Qyzylorda oblysynda pnevmoniianyń aýyr túrindegi naýqastardyń azaiǵany baiqalady, dep habarlaidy "Ult aqparat".
Premer-Ministrdiń orynbasary Eraly Toǵjanov Qyzylorda oblysyna sapary barysynda jergilikti birqatar meditsinalyq mekemelerdiń jumys barysymen tanysyp, dári-dármekpen qamtamasyz etý jaǵdaiyna nazar aýdardy.
Oblystyq jedel járdem stantsiiasy dárigerlerimen júzdeský barysynda Eraly Toǵjanovqa oblys ákimi Gúlshara Ábdiqalyqova aimaqtaǵy jedel járdem jumysy mobildi qyzmetti iske asyrý arqyly oń kórsetkishke qol jetkizgenin aityp ótti.
Sonyń nátijesinde turǵyndar tarapynan shaqyrtý sany tómendegen. Aimaqtaǵy epidemiologiialyq ahýal kúrdeli kezeńde jedel járdem shaqyrtýy táýligine 2500-den asyp, dárigerlerge júkteme 2 ese artqan bolatyn. Qazir ahýal turaqtaldy, shaqyrtý sany da azaidy.
Maýsym aiyndaǵy shaqyrý sharyqtaý shegimen salystyrǵanda qazir 52,7 paiyz azaiýy baiqalady. Al sońǵy 2 aptada jalpy oryndalǵan jalpy shaqyrý sany 39 paiyzǵa tómendedi. Onyń ishinde tynys alý joldarynyń aýrýlary 74 protsentke kemise, jedel respiratorlyq virýsty infektsiia jaǵdailary 82,5, pnevmoniia jaǵdaiy 60 paiyzǵa tómendegen.
Pnevmoniia jaǵdaiymen shaqyrý kóp kezinde naýqastardyń 85 paiyzy statsionarǵa jatqyzyldy. Al qazir 45,3 paiyzy tasymaldanyp, jatqyzý kórsetkishi 79,3 paiyzy qurap otyr. Iaǵni, aýyr túrdegi naýqastardyń azaiǵany baiqalady.
Vitse-premer jedel járdem stansasynyń shaqyrtýlardy qabyldaityn dispetcher bólimindegi Sall-ortalyqtyń jumys protsesin baqylady. Epidemiologiialyq kúrdeli ýaqytta munda ár dispetcher kúnine 150 qońyraý qabyldap kelgen. Búginde shuǵyl qońyraýlar azaiǵan.
Sondai-aq, Eraly Toǵjanov kópbeiindi Qyzylorda oblystyq aýrýhanasynyń jumysymen tanysty.
Kópbeiindi oblystyq aýrýhana 1998 jyly paidalanýǵa berilgen. Aýrýhanada jalpy 525 tósek orny bar. Aýrýhanada 17 ókpeni jasandy jeldetý apparaty, 300 ottegi ballony, 6 ottegi kontsentratory bar. Bir táýlikte 60 ottegi ballonyn paidalaný qajet etiledi.
Naýqastarǵa arnalǵan 30 tósek-oryndyq infektsiialyq statsionar, 70 filtr bólmesi uiymdastyrylǵan. Filtr bólmeleriniń ishinde 13 oryn jansaqtaý bólimine arnalǵan. Búgingi kúni statsionarda - 7, filtr bólmelerinde - 38 adam emdelýde.
Búgingi kúni Qyzylorda oblysy boiynsha 328 dárihana, dárihana pýnkteri farmatsevtikalyq qyzmetpen ainalysady. Onyń 178-i Qyzylorda qalasynda ornalasqan. Indettiń taralmaýyna qajetti dári-dármektiń ýaqytyly jetýi jáne baǵasynyń negizsiz kóterilmeýin arnaiy monitoring toby baqylaýda ustaidy.
Búgingi kúnge deiin monitoring toby qaladaǵy 9 emhana men «SQ-Farmatsiia» JShS dárilik qoimasyna, 86 dárihanaǵa monitoring júrgizdi. Sonyń nátijesinde aimaqta dárihanalardaǵy uzyn-sonar kezek azaidy.
Dárihanada halyq tarapynan únemi suranystaǵy Eýffelin», «S» vitamini, «Sýmamed», «Tsiprolet», «V» vitaminder kesheni «Milgamma», «Remaberin», «Polioksidonii», «Oflo» sekildi dárilik zattary kelip túsedi.
Vitse-Premer oblystaǵy dárilik zattardyń jetkilikti bolýyn qamtamasyz etýdi jáne halyq suranysyndaǵy dárilerdiń udaiy jetýin nazarǵa alýdy jetkizdi.
Eske sala keteiik, búgin Qyzylorda oblysyna jasaǵan sapary barysynda Eraly Toǵjanov qaterli indetpen kúreste halyqtyń da jaýapkershiligi úlken ekenin atap ótti .
