Memlekettik-jekemenshik áriptestik aiasynda 75 jobanyń 29-y densaýlyq saqtaý salasynda júzege asyrylyp jatyr. Bul týraly Qyzylorda oblysynyń ákimi Qyrymbek Kósherbaev QR Parlamenti Senatynyń Áleýmettik-mádeni damý jáne ǵylym jónindegi komitetiniń kóshpeli otyrysynda málimdedi.
QR Parlamenti Senatynyń depýtattary jumys saparymen Qyzylorda oblysyna keldi. Issapar barysynda olar Syr óńirindegi áleýmettik nysandardyń jumysymen tanysady.
Densaýlyq saqtaý jáne bilim berý salasynyń memlekettik-jekemenshik áriptestikke qatysty máselelerine arnalǵan otyrysta oblys ákimi Qyrymbek Kósherbaev óńirdiń áleýmettik-ekonomikalyq damýy men memlekettik-jekemenshik áriptestikti damytý boiynsha júrgizilip jatqan jumystar týraly aitty.
«Qazirgi tańda memlekettik-jekemenshik áriptestik aiasynda óńirde 75 joba júzege asyrylýda. Basym bóligi densaýlyq saqtaý salasy boiynsha, iaǵni 75 jobanyń 29-y nemese 39 paiyzy osy salaǵa tiesili. Sondai-aq, sport, bilim berý, tsifrlandyrý jáne turǵyn úi-kommýnaldyq sharýashylyǵyn jańǵyrtý boiynsha jobalar da iske asýda», - dedi aimaq basshysy.
Aita ketý kerek, Qyzylorda oblysy memlekettik-jekemenshik áriptestikti damytý boiynsha elimizdegi bes úzdik aimaqtyń biri bolyp tabylady jáne júzege asyrylatyn jobalar ekonomikanyń barlyq salalaryn qamtidy. Mysaly, densaýlyq saqtaý salasynda 29 joba; Dene shynyqtyrý jáne sport salasynda 12 joba; Turǵyn úi-kommýnaldyq sharýashylyq salasynda 10 joba; Bilim berý salasynda 8 joba; Tsifrlandyrý salasynda 7 joba; Jolaýshylar kóligi jáne avtomobil joldary salasynda 5 joba, mádeniet, áleýmettik qamsyzdandyrý, qoǵamdyq tártip jáne ekologiia salalarynda bir jobadan júzege asýda.
Sonymen qatar, qazirgi ýaqytta aimaqta 18 MJÁ kelisimsharty jasalǵan. Onyń ishinde 10 meditsinalyq dispanser qurylysy, 4 sporttyq-saýyqtyrý keshenin jalǵa berý jáne qyzmet kórsetý, Qyzylorda qalasyndaǵy bir aýysymda 400 kelýshige qyzmet kórsete alatyn emhana ashý, Jalaǵash aýdany Tan aýyldyq okrýginde balabaqsha salý, Qyzylorda qalasyndaǵy № 101 orta mektepte arnaiy áleýmettik qyzmetter kórsetýge kishigirim úi salý jáne qazandyǵyn jańǵyrtý (gaz jylytý júiesine kóshirý) jumystary júrgiziledi.
Aimaq basshysy jobalardy iske asyrý MJÁ jobalaryn tiimdi josparlaý týraly jalpy túsinik qalyptastyrýdy talap etetinin atap ótti.
«Memlekettik-jekemenshik áriptestik mehanizmin naqty investorlar qyzyǵýshylyq tanytqan jobalardyń investitsiialyq tartymdylyǵyn arttyrý úshin ǵana paidalaný kerek. Óitkeni, jobalardy iske asyrý investor úshin kiris deńgeiin qamtamasyz etip qana qoimai, memleket tarapynan olarǵa tólenetin ótemaqy mólsherin barynsha azaitýǵa, qajetsiz shyǵyndardy joiýǵa múmkindik beredi», - dep atap ótti aimaq basshysy.
Sharada QR Densaýlyq saqtaý vitse-ministri Oljas Ábishev, QR Bilim jáne ǵylym ministrliginiń Balalardyń quqyqtaryn qorǵaý komitetiniń tóraǵasy Nurbek Orshýbekov, Qyzylorda oblysy ákiminiń orynbasary Evgenii Kim, «Qazaqstandyq memlekettik-jekemenshik áriptestik ortalyǵy» AQ basqarma tóraǵasynyń orynbasary Talǵat Mataev, №2 «Nur-Shuǵyla» jekemenshik balabaqshasynyń bastyǵy Bibiaisha Tólegenova sóz sóiledi.
QR Parlamenti Senatynyń Áleýmettik-mádeni damý jáne ǵylym jónindegi komitetiniń tóraiymy Birǵanym Áitimova kezdesýdi qorytyndylady.
Birǵanym Áitimova: «Biz memlekettik-jekemenshik áriptestik sheńberinde salynǵan birqatar balabaqshalardyń, nysandardyń jumysymen tanystyq. Áriptesterimizben birge Qyzylorda oblysyndaǵy bul tájiribeni úzdik úlgi retinde respýblika boiynsha engizý kerek dep oilaimyz», - dedi.
Jumys sapary barysynda Senat depýtattary MJÁ aiasynda jumys isteitin oblys ortalyǵyndaǵy jekemenshik balabaqshalaryn aralap kóredi. Aimaqta shamamen 400 jekemenshik balabaqsha bar, atap aitqanda memlekettik bilim berý tapsyrysy berilgen mektepke deiingi bilim mekemeleriniń jalpy sanynyń 71 paiyzyn quraidy. Bul respýblika boiynsha eń jaqsy kórsetkish.
Sonymen qatar, depýtattar 400 oryndyq emhananyń, Qazaq gýmanitarlyq-zań jáne tehnikalyq kolledjiniń, Tarlan fitnes-ortalyǵynyń jumysymen tanysady.
Sondai-aq, Qorqyt ata atyndaǵy Qyzylorda memlekettik ýniversitetiniń oqytýshylarymen, kópbalaly otbasylarymen kezdesip, Syrdariia, Qarmaqshy jáne Aral aýdandary men Baiqońyr qalasynyń áleýmettik-mádeni nysandaryn aralaidy.
