QR Parlamenti Senatynyń Áleýmettik-mádeni damý jáne ǵylym jónindegi komitetiniń tóraiymy Birǵanym Áitimova densaýlyq saqtaý jáne bilim berý salasynyń memlekettik-jekemenshik áriptestikke qatysty máselelerine arnalǵan kóshpeli otyrysta Qyzylorda oblysynyń mektepke deiingi mekemeler boiynsha tájiribesin úzdik úlgi retinde respýblika boiynsha engizýge usynys bildirdi.
Atap ótsek, aimaqta 396 jekemenshik balabaqsha bar, iaǵni mektepke deiingi bilim mekemeleriniń jalpy sanynyń 75 paiyzyn quraidy. Bul respýblika boiynsha eń jaqsy kórsetkish.
«Biz memlekettik-jekemenshik áriptestik sheńberinde salynǵan birqatar balabaqshalardyń, nysandardyń jumysymen tanystyq. Áriptesterimizben birge Qyzylorda oblysyndaǵy bul tájiribeni úzdik úlgi retinde respýblika boiynsha engizý kerek dep oilaimyz», - dedi Birǵanym Áitimova.
Qazirgi tańda memlekettik-jekemenshik áriptestik aiasynda óńirde 75 joba júzege asyrylýda. Olardyń 29-y densaýlyq saqtaý; 12-si dene shynyqtyrý jáne sport; 10-y turǵyn úi-kommýnaldyq sharýashylyq; 8-i bilim berý; 7-eýi tsifrlandyrý; 5-eýi jolaýshylar kóligi jáne avtomobil joldary salalaryna tiesili bolsa, al mádeniet, áleýmettik qamsyzdandyrý, qoǵamdyq tártip jáne ekologiia salalarynda 1 jobadan júzege asyrylýda.
Eske salaiyq, Qyzylorda oblysyna QR Parlamenti Senatynyń depýtattary jumys saparymen kelgen bolatyn. Issapar barysynda olar Syr óńirindegi áleýmettik nysandardyń jumysymen tanysty.
Sondai-aq, Syrdariia, Qarmaqshy jáne Aral aýdandary men Baiqońyr qalasynyń áleýmettik-mádeni nysandaryn aralaidy.
