Qyzylorda oblysynda koronavirýspen kúreske meditsina salasynyń 3 myńǵa jýyq qyzmetkeri jumyldyryldy. Bul týraly óńir ákimi Gúlshara Ábdiqalyqova Facebook-paraqshasynda jazdy, dep habarlaidy "Ult aqparat".
Aimaq basshysy álemdi jailaǵan koronavirýs óńirdiń túkpir-túkpirine taralyp úlgergenine nazar aýdardy. Qazir oblys boiynsha 116 adam qaterli indettiń quryǵyna ilikken.
«Buǵan problemanyń shyn máninde alapat ekenin áli de bolsa túsine almaýymyz sebep. Onyń qanshama adam ómirin jalmap jatqanyn estisek te, kórsek te, tiisti mán bermeimiz. Indetten qorǵanbaimyz. Tek saqtansań ǵana saqtaitynyn esten shyǵarǵandaimyz. Mine, osyndai kózqaras sanamyzda turaqtap qalǵan. Qazir kóshede júrgen adam da, kólik te kóp. Tártip birkelki oryndalyp jatqan joq. Kei mekemelerdiń, dúkenderdiń, dárihanalardyń aldy adam aiaǵynan arylmaidy. Tosqaýyl beketteri she? San túrli aila-tásilderdi oilap taýyp, ainalyp ótpek bolǵandar da bar. Taiaýda karantinge qaramai, ań-balyqqa shyǵýdyń arty apatqa ulasqanyn da kórip-bildińizder. Oilanaiyq! Koronavirýstyń sońy ólimge ákep soǵýy ábden múmkin. Osy kúnniń ózinde, 10 otandasymyz qaýipti keselden kóz jumdy», - dep atap kórsetti.
Sondai-aq, oblys basshysy oblysta turǵyndardyń qaýipsizdigi úshin qatań sharalar qabyldanyp jatqanyn, biraq ereje oryndalmasa, tártip saqtalmasa, jumys esh nátije bermeitinin qadap aitty.
«Aimaq boiynsha bul virýspen kúreske meditsina salasynyń 3 myńǵa jýyq qyzmetkeri jumyldyryldy. Tosqaýyl beketterinde 200 politsei men 170 áskeri qyzmetker úzdiksiz kezekshilik etip tur. Endi qoǵamnyń árbir múshesi jaýapkershilikti túsinýi kerek. Syr halqy ǵasyrlar boiǵy tarihynda talai qiyndyqty eńsergen. Taǵy bir synaqty artta qaldyratyn kez keldi. Men sizderden azamattyq jaýapkershilik tanytýdy suraimyn», - dedi.
Gúlshara Ábdiqalyqova sonymen qatar jeke paraqshasyna kóptegen mańyzdy ári mazmundy usynystar kelip jatqanyn jetkizdi.
«Árqaisysy boiynsha basqarma jáne bólim basshylaryna tiisti tapsyrmalar berilgen. Biz halyqpen keri bailanysty turaqty túrde jalǵastyratyn bolamyz. Árbir pikir mańyzdy», - dedi ol.
Qazirgi tańda Qyzylorda oblysynda koronavirýs infektsiiasy rastalǵan 119 adam bar.
