Qyzylorda oblysynda brakonerlerden 1 tonna balyq tárkilendi, dep habarlaidy QazAqparat tilshisi.
«2019 jyldyń 25 jeltoqsanynda reid barysynda Qyzylorda oblysynyń orman sharýashylyǵy jáne janýarlar álemi aýmaqtyq inspektsiiasynyń inspektorlary qarmaqshy aýdanynyń aýmaǵynda ÝAZ markaly kólikti toqtatyp, onyń ishinde adamdardyń 1 tonna 153 keli balyqtyń zańsyz áketip bara jatqanyn anyqtady», - dep jazady Ekologiia, geologiia jáne tabiǵi resýrstar ministrliginiń Orman sharýashylyǵy jáne janýarlar álemi komitetiniń baspasóz hatshysy Sáken Dildahmet Facebook paraqshasynda .
Tabiǵat qorǵaýshylar brakonerlerdi Qarmaqshy aýdanynyń politsiia bólimine jetkizdi.
Qazirgi ýaqytta atalmysh fakt boiynsha QR Qylmystyq kodeksiniń 335-baby 3-bóligi boiynsha sotqa deiingi tergeý amaldary júrgizilip jatyr.
