Memlekettik-jekemenshik áriptestik aiasynda jumys isteitin aimaqtaǵy balabaqshalardyń sany 2013 jyldan bastap 2 esege artty. Óńirdegi bilim berý salasyndaǵy jumystar barlyq deńgeide júieli túrde júrgizilýde. Bul týraly búgin Astana qalasynda Ortalyq kommýnikatsiialar qyzmetinde ótken baspasóz máslihatynda Qyzylorda oblysynyń ákimi Qyrymbek Kósherbaev málimdedi, dep habarlaidy "Ult aqparat".
"2013 jyldan bastap memlekettik-jekemenshik áriptestik negizinde jumys isteitin balabaqshalar sany 2 esege artyp, 71%-dy qurady. Osylaisha, biz qarjyny qaita qarastyryp, artylǵan qarajatty basqa da áleýmettik-ekonomikalyq mindetterdi sheshýge jumsaimyz. MJÁ aiasynda búginde túrli salalar boiynsha 34 mlrd. teńgeden astam qarjyǵa 75 joba júzege asyrylýda", - dedi aimaq basshysy.
Memleket basshysy N.Á.Nazarbaevtyń Qazaqstan halqyna Joldaýynda Nazarbaev ziiatkerlik mektebiniń oqytý júiesi men ádistemesin biryńǵai standart retinde engizýdi basymdyqtardyń biri dep belgiledi. Aita keteiik, Qyzylorda oblysynda 2015 jyly oblys ákimdigi men "Nazarbaev ziiatkerlik mektebi" arasynda orta bilim berý salasynda ózara yntymaqtastyq týraly memorandýmǵa qol qoiylǵan bolatyn.
Memorandým aiasynda 46 innovatsiialyq mektepke eki negizgi mindet júkteldi: litseiler men gimnaziialar jelisin keńeitý arqyly NZM-niń ozyq tájiribesin taratý jáne litsei synyptarynda, onyń ishinde jaratylystaný-matematikalyq jáne gýmanitarlyq baǵyttaǵy jekelegen pánderdi aǵylshyn tilinde tereńdetip oqytý.
Aǵymdaǵy oqý jylynda oblystyń 46 innovatsiialyq mektebi biologiia, himiia, informatika, fizika pánderi boiynsha aǵylshyn tilinde pilottyq oqýǵa kiristi. Budan basqa, NZM tájiribesin taratý sheńberinde 104 mektepte elektivti kýrstar esebinen osy pánderdi aǵylshyn tilinde oqytý elementteri engizildi.
Osyǵan orai, M.Mámetova atyndaǵy Qyzylorda pedagogikalyq joǵary kolledjinde aǵylshyn tilin meńgergen fizika, informatika, matematika muǵalimderine daiyndyq júrgizilýde. Nazarbaev ziiatkerlik mektepteriniń oqý baǵdarlamalaryna jańa tehnologiialardy, ǵylymi innovatsiialardy, matematikalyq modeldeýdi, baǵdarlamalaý men robototehnikany damytýǵa baǵyttalǵan STEM-elementteri engizilgen. STEM-bilim berýdegi NZM-niń ońtaily tájiribesin eskere otyryp, oblys mektepteri robototehnika, jańartylǵan fizika, himiia, biologiia jáne 3D-modeldeý kabinetterimen jabdyqtalýda.
2013 jyldan bastap jyl saiyn az qamtylǵan otbasylardan shyqqan, ásirese aýyldyq jerlerdiń daryndy túlekterine arnalǵan aimaq basshysynyń 100 bilim berý granty bólinýde, biyl olardyń sany 2 esege artty, osylaisha oblys ákiminiń grant iegerleriniń jalpy sany 900-ge jetip otyr.
"Aita ketý kerek, ótken jáne aǵymdaǵy jylǵy aimaqtaǵy mektep túlekteriniń 97%-y joǵary oqý oryndary men kolledjderge tústi. Bul bizge marginal jastarǵa arnalǵan áleýmettik bazany aitarlyqtai jaqsartýǵa múmkindik beredi. Ózderińizge málim, dál solardyń arasynan qylmystyq toptar men dini ekstremisterdiń músheleri quralady", - dep atap ótti aimaq basshysy.
Esterińizge sala keteiik, Qyzylorda oblysy - 2014 jyldan bastap RF Úkimetiniń granty boiynsha Reseidiń bedeldi tehnikalyq joǵary oqý oryndarynda júzdegen túlekterin oqytýdy uiymdastyra alǵan elimizdegi jalǵyz oblys. Máskeý bolat jáne qorytpalar institýty men Sankt-Peterbýrg memlekettik tehnologiialyq ósimdik polimerleri ýniversitetinde Resei Federatsiiasy Úkimetiniń granty esebinen bilim alý múmkindigine ie bolǵan 452 stýdenttiń alǵashqy 32-si oqýyn támamdap, osy jyly elge oraldy. Al, 42 túlek magistratýrada oqýyn jalǵastyrýda. Aǵymdaǵy jyly 58 syr boiylyq túlek oqýǵa túsken. Osylaisha, óńir mektepteriniń 510 túlegi Máskeý men Sankt-Peterbýrgtiń jetekshi tehnikalyq joǵary oqý oryndarynda RF Úkimetiniń granttaryna ie boldy.
