2018 jylǵy reiting qorytyndysy boiynsha Qyzylorda oblysy biznesti júrgizý úshin qolaily jaǵdai jasaǵan eń úzdik óńir dep tanyldy.
Búgin "Indýstriialandyrýdyń ekinshi besjyldyǵy. Qazaqstanda jasalǵan" Jalpyulttyq telekópir barysynda Memleket basshysy Qyzylorda oblysynyń ákimi Qyrymbek Kósherbaevqa «Eń úzdik biznes orta qurǵany úshin» nominatsiiasy boiynsha "Altyn sapa" syilyǵyn tabystady.
Aita keteiik, 2018 jyldyń 1 qarashasynda óńirde 51 956 shaǵyn jáne orta biznes sýbektisi tirkelgen, onyń ishinde 42 066 jumys istep tur. Ótken jyldyń sáikes kezeńimen salystyrǵanda shaǵyn jáne orta biznes sýbektileriniń sany 12,7 paiyzdy qurady. Bul - respýblikada eń jaqsy kórsetkish. Sonymen qatar, jumys istep turǵan shaǵyn jáne orta biznes sýbektileriniń úlesi tirkelgender sanynyń 80,9% - yn qurady.
Esterińizge sala keteiik, jappai kásipkerlikti damytý, halyqty jumyspen qamtý máselelerin tiimdi sheshý men jalpy ishki ónimdegi shaǵyn jáne orta biznestiń úlesin aitarlyqtai arttyrý maqsatynda oblys ákimdiginiń, oblystyq máslihattyń, "Nur Otan" partiiasy filialynyń, qoǵamdyq keńestiń jáne óńirlik kásipkerler palatasynyń sheshimimen 2018-2020 jyldary óńirde jappai kásipkerlikti damytýdyń úsh jyldyǵy retinde jariialandy. Jyl basynda "Jappai kásipkerlikti damytýdyń jol kartasy" ázirlendi. Shaǵyn jáne orta biznesti qarjylandyrýǵa respýblikalyq jáne oblystyq biýdjetten, bankter men qorlardan 32 milliard teńgeden astam qarjy bólindi. Onyń ishinde startap-jobalarǵa 3 milliard teńgeden astam qarjy qarastyrylǵan.
Jappai kásipkerlikti, ásirese aýyldyq jerlerde damytýǵa óńirde basymdyq berilip otyr, oblystyń árbir aýyldyq eldimekenine jergilikti atqarýshy organdar men ortalyq memlekettik organdardyń aýmaqtyq bólimsheleriniń basshylarynan shaǵyn jáne orta biznesti damytýǵa jaýaptylar bekitildi. Sonymen qatar, jyl qorytyndysy boiynsha óz isin osy jyly bastaǵan ár aýdan men oblys ortalyǵyndaǵy úzdik startap-kásipkerlerdi, sondai-aq aýdannyń úzdik ákimin jáne jaýapty laýazymdy tulǵany 1 mln.teńge kólemindegi syiaqymen marapattaý týraly sheshim qabyldandy.
Eske salaiyq, bolashaq jáne óz isterin bastaǵan kásipkerler úshin barlyq qolaily jaǵdailardy jasaý maqsatynda Kásipkerler úii ashyldy. Munda oblystyq Kásipkerlik jáne týrizm basqarmasy, «Qyzylorda» Óńirlik investitsiialyq ortalyǵy, Kásipkerlerge qyzmet kórsetý ortalyǵy, «Jobalarǵa saraptama júrgizý ortalyǵy» JShS, Óńirlik kásipkerler palatasy, ekinshi deńgeili birqatar bank filialdary jáne ózge de mekemeler ornalastyrylǵan. Sondai-aq, aimaqtyń kásipkerleri úshin elektrondyq qyzmet túrlerin tegin alýǵa bolatyn onlain-kabinet jumys isteidi.
