Qyzylorda oblysy ákiminiń eki birdei jańa orynbasary taǵaiyndaldy, dep habarlaidy "Ult aqparat".
Qazaqstan Respýblikasy Prezidenti Ákimshiliginiń kelisimi boiynsha oblys ákiminiń ókimimen Jahanov Bahyt Dúisenuly men Delmuhanov Marat Nursaiynuly oblys ákiminiń orynbasary qyzmetterine taǵaiyndaldy.
B. Jahanov 1974 jyly týǵan. Y. Jaqaev atyndaǵy Qyzylorda politehnikalyq institýtyn «ekonomist-menedjer» mamandyǵy boiynsha bitirgen. Eńbek jolyn 1996 jyly Qyzylorda oblysynyń aýyl sharýashylyǵy departamentiniń jetekshi mamany bolyp bastaǵan. Ár jyldary Qyzylorda oblysynyń ekonomika, tabiǵi resýrstar jáne tabiǵat paidalanýdy retteý, sondai-aq bilim basqarmalarynda jaýapty qyzmetter atqarǵan. 2008-2011 jyldary Qyzylorda oblysynyń aýyl sharýashylyǵy, tabiǵi resýrstar jáne tabiǵat paidalanýdy retteý basqarmalaryn basqarǵan. 2011-2015 jyldary Qyzylorda oblysy ákiminiń orynbasary, Qazaly aýdanynyń ákimi boldy. 2015 jyldyń maýsym aiynan bastap osy kezge deiin Qyzylorda oblysynyń aýyl sharýashylyǵy basqarmasynyń basshysy qyzmetin atqaryp keldi.
M. Delmuhanov 1979 jyly dúniege kelgen. M. Ótemisov atyndaǵy Batys Qazaqstan memlekettik ýniversitetin «býhgalter-ekonomist» jáne «zańger» mamandyqtary boiynsha bitirgen. Eńbek jolyn 2001 jyly Batys Qazaqstan oblysynyń ekonomika basqarmasynyń bas mamany retinde bastaǵan. 2002-2010 jyldary Batys Qazaqstan oblysy ákimi apparaty taldaý-eksperttik bóliminiń bas mamany, uiymdastyrý-baqylaý bóliminiń bas inspektory, bólim meńgerýshisi, Batys Qazaqstan oblysy ákimi apparaty basshysynyń orynbasary, «Tehnopark «Algoritm» jaýapkershiligi shekteýli seriktestiginiń direktory, 2010-2013 jyldary Mańǵystaý oblysy ákimi apparatynda qyzmet atqaryp, odan keiin Mańǵystaý oblysy ákimi apparaty basshysynyń orynbasary boldy.
Al 2013-2017 jyldary Qyzylorda oblysy ákimi apparaty basshysynyń orynbasary, Qyzylorda oblysynyń jumyspen qamtýdy úilestirý jáne áleýmettik baǵdarlamalar basqarmasynyń basshysy qyzmetin atqarǵan. 2017 jyldyń maýsym aiynan bastap osy kezge deiin Kyzylorda oblysy ákimi apparatynyń basshysy laýazymynda eńbek etti.
