Koronavirýs indetine bailanysty karantinge jabylǵan Qyzylorda qalasy men Jańaqorǵan aýdanynda blokbeketter qoiyldy.
Bul týraly Qyzylorda oblysynyń ákimi Gúlshara Ábdiqalyqova aityp berdi, dep habarlaidy QazAqparat.
Ákimniń aitýynsha, Qyzylorda qalasyna kireberis joldarǵa 4 tosqaýyl beketi qoiylǵan.
«Birinshi baǵyt - «Shieli-Qyzylorda» avtojoly, ekinshi baǵyt – «Qyzylorda-Jezqazǵan» avtojoly, Abai eldimekeni tusynda, úshinshi baǵyt – «Qyzylorda-Jalaǵash» avtojoly, Qaraózek eldimekeni tusynda, al tórtinshi baǵyt – Tuńǵysh Prezident atyndaǵy saiabaq mańynda. Ár bekette 14 áskeri qyzmetker kezekshilikpen jumys isteidi. Arnaiy tehnika jáne adam tasýǵa arnalǵan avtokóliktermen qamtylǵan. Oblystyq politsiia departamenti men densaýlyq saqtaý basqarmasynyń mamandary da táýlik boiy karantin erejeleriniń saqtalýyn qadaǵalaidy», - dedi G. Ábdiqalyqova «Habar 24» telearnasyndaǵy málimdemesinde.
Qaýipti kesel juqtyrý deregi kúrt óskendikten, ákim Jańaqorǵandy da karantinge jaýyp, aýdan ortalyǵynyń kirip-shyǵý joldaryna 4 blokbeket qoiylǵanyn habarlady.
Sonymen birge, oblys shekarasynda 2 baǵyt boiynsha 3 baqylaý-ótkizý beketi jumys istep tur.
Aita keteiik, qazirgi ýaqytta oblys boiynsha infektsiia juqtyrǵandar sany 26-ǵa jetti. Onyń ishinde Qyzylorda qalasynda - 6, Jańaqorǵan aýdanynda - 16, Qarmaqshy aýdanynda - 2, Shieli aýdanynda - 2 oqiǵa tirkelgen.
