Qyzylorda qalasy jáne Jańaqorǵan aýdany karantinge jabyldy dep habarlady Qyzylorda oblysynyń ákimi Gúlshara Ábdihalyqova.
"Qazirgi ýaqytta oblys boiynsha infektsiia juqtyrǵandar sany 26-ǵa jetti. Onyń ishinde Qyzylorda qalasynda – 6, Jańaqorǵan aýdanynda – 16, Qarmaqshy aýdanynda – 2, Shieli aýdanynda 2 oqiǵa tirkelgen. Qazir Qyzylorda, Jańaqorǵan aýdandary karantinge jabyldy" dedi Gúlshara Ábdihalyqova beisenbi kúngi brifing kezinde.
Onyń aitýynsha, adamdar men kólikter qozǵalysyna shekteý qoiylǵan. Qyzylordaǵa kiretin aýmaqqa tórt blokpost qoiylǵan. Oblys aýmaǵynyń shekarasynda úsh baqylaý-ótkizý pýnkti istep tur.
Qazaqstanda koronavirýs juqtyrǵandar sany 403-ke jetti. 2 sáýirde tańerteń ministrlik 16 adamnan virýs tabylǵanyn habarlaǵan.
Qyzylorda oblysy - virýs juqtyrǵandar sany boiynsha respýblikada Nur-Sultan jáne Almaty qalalarynan keiin úshinshi orynda tur. Buǵan deiin oblystyq densaýlyq saqtaý basqarmasy oblysta bir otbasynda segiz adamnan koronavirýs tabylǵanyn habarlaǵan edi.
