Búgin Qyzylaǵashtaǵy sý tasqyny oqiǵasyna 10 jyl tolýyna orai oblys əkimi Amandyq Batalov Qyzylaǵash aýylyna arnaiy bardy. Aldymen cý tasqyny qurbandaryna arnalǵan eskertkish-monýmentke aýyl turǵyndarymen birge gúl shoqtaryn qoidy. Sol bir qiyn kezeńdi eske túsirip, kópshilikke lebizin bildirdi, dep habarlaidy "Ult aqparat" óńir basshysynyń baspasóz qyzmetine silteme jasap.
- Búgin, mine, Qyzylaǵash oqiǵasyna on jyl toldy. "Ómir - ózen" degen, ýaqyt jyldam ótedi. Biraq sol bir aýyr kúnder əli kóz aldymda. Sý aýyldy túgeldei jaipap, qanshama adamnyń ómirin qiyp ketti. Sol azamattardyń jany jannatta bolsyn dep tileimiz. Elbasy Nursultan Əbishuly Nazarbaev shuǵyl tapsyrma berip, Qyzylaǵashty qalpyna keltirýge barlyq kúshti jumyldyrdy. Osy arada shtab qurylyp, tynymsyz jumys jasaldy. Úilerdi jańadan salyp, jaryq, sý, bailanys jelileri jańadan tartyldy, jol túgeldei qaita tóseldi. Sol shaqta qalpyna keltirý isiniń basy-qasynda Bolat Tákenov, Serik Muqanov, Naýryz Qylyshbaev, Sergei Salagaev jáne basqa da azamattar júrdi. Sol qatarda bolǵan Áskerbek Dúisembaev, Maralbek Meiirbekov, Janaidar Jylqaidarovtar búginde aramyzda joq. Biz barlyq qiyndyqty bereke-birligimizdiń arqasynda eńserdik. Aýyl turǵyndary da tózimdilik tanytyp, yntymaǵyn kórsetti. Búkil qazaqstandyqtar qolynda barymen bólisip, qol ushyn berdi. Biz bir de bir adamdy kómeksiz qaldyrǵan joqpyz. Qyzyl sý basqan Aqtoǵan men Eginsý aýyldaryn da qalpyna keltirdik. Mektep, balabaqsha, dárigerlik ambýlatoriia siiaqty áleýmettik nysandar da jańadan salyndy. Qazir Qyzylaǵash aýyly eń kórikti aýyldardyń qatarynda. Biz jaqynda Qyzylaǵash sý qoimasynyń qurylysyn aiaqtadyq. Sonyń nátijesinde 7 myń gektardai sýarmaly jer ainalymǵa qosylady. Aýyldyń, eldiń berekesi nyǵaia bersin. Endi mundai qiyndyqty eshkimniń basyna bermesin. Balalarymyz alańsyz ósip-ónip, táýelsiz memleketimiz órkendei bersin! Aspanymyz ashyq, elimiz tynysh bolsyn! – dedi A. Batalov.
Munan soń «Jansúgirov» qoǵamdyq qorynyń direktory, Aqsý aýdandyq qoǵamdyq keńestiń tóraǵasy Sábit Qorǵanbaev pen Qyzylaǵash aýyldyq aqsaqaldar keńesiniń tóraǵasy Álǵumar Ydyrysuly sóz alyp, elge yntymaq, jerge yrys tiledi.
Eske alý rásimi aýyl meshitine baryp, quran baǵyshtap, qurban shalýmen jalǵasty.
