Almaty oblysynda osydan 10 jyl buryn bógeti jarylyp, isten shyqqan Qyzylaǵash sý qoimasy qalpyna keltirildi. Biyl bul sý qoimasynan Aqsý aýdanynyń sýarmaly alqaptaryna tirshilik nári jiberiledi, dep habarlaidy "Ult aqparat".
Qyzylaǵash sý qoimasyn qalpyna keltirý jumystary 2016-2019 jyldary aralyǵynda júrgizildi. Joba quny 5,6 mlrd teńge. Bas merdiger «QazSýShar» RMK Almaty filialy. Qazirgi tańda barlyq mehanikalyq jumystar aiaqtaldy. Aldaǵy ýaqytta avtomattandyrý boiynsha jabdyqtar ornatylmaq.
«Biiktigi 55 metr bóget salynyp, barlyq talaptarǵa sai bekitildi. Sýqoima janynan jumysshylarǵa eki páterli eki úi jáne tómendegi sý taratý torabynan eki páterli eki úi salyndy. Qyzylaǵashtyń jalpy syiymdylyǵy 42 mln tekshe metr. Biyl 20 mln tekshe metr sý jinap, Aqsý aýdanynyń 4 myń gektar alqabyn sýmen qamtamasyz etý josparlanǵan», - deidi «QazSýShar» RMK Almaty filialy basshysy Smaiyl Kýmetov.
Esterińizge sala keteiik, 2010 jyly naýryzdyń 11-nen 12-ine qaraǵan túni tolassyz jaýǵan qar men jańbyr saldarynan Qyzylaǵash sý qoimasy jarylyp, Qyzylaǵash aýylyn shaiyp ketken edi. Qaiǵyly oqiǵa saldarynan 45 adam qaza taýyp, 460-tan astam úi jermen-jeksen boldy. Qazaqstan halqynyń uiymshyldyǵy men óńir basshylyǵynyń jedel áreketiniń arqasynda jańadan úiler salynyp, turǵyndar 1,5-2 aidyń ishinde qaita aýylǵa oraldy.
